Şou-biznes

Ana səhifə

Şou-biznes

“50 Cent” “Buta Palace” səhnəsindən Azərbaycan tamaşaçısına köynəyini, papağını, dəsmalını hədiyyə edib - FOTOSESSİYA

“50 Cent” “Buta Palace” səhnəsindən Azərbaycan tamaşaçısına köynəyini, papağını, dəsmalını hədiyyə edib - <font color=red>FOTOSESSİYA</font>

12 aprel 2010 09:12 (UTC +04:00)

APA-nın məlumatına görə, “Korsika Lounge” şirkətinin həyata keçirdiyi konsertdə təşkilatçı şirkətin yeni fəaliyyətə başlaması ilə əlaqədar olaraq yetəri qədər problem yaşanıb. 20:00 üçün nəzərdə tutulan konsert bir saat gec başlayıb. Konsertin gecikməsinə səbəb isə “Buta Palace”in qarşısında toplaşan çoxsaylı tamaşaçıların içəri gec buraxılması olub. Bu hal isə izləyicilərin ciddi narazılığına səbəb olub. Hətta dəvət olunmuş media mənsublarının konsert salonuna buraxılmasında xoşagəlməz problemlər yaşanıb. Belə ki, jurnalistləri dəfələrlə bu qapıdan o qapıya göndərən təşkilatçı şirkətin nümayəndələri, eləcə də mühafizə xidməti daha sonra jurnalistləri konsert salonuna buraxıblar. Fotoqrafların konsertə keçməsi isə mümkün olmayıb. Təşkilatçı şirkət nümayəndələrinin dediyinə görə, “50 Cent” onların qarşısında şərt qoyub ki, əgər konsertdə fotoaparatla çəkiliş aparıldığını görsə, o səhnəni tərk edəcək. Təşkilatçılar isə bu problemi yaşamamaq üçün fotoqrafların içəri fotoaparatsız buraxılmasına razılıq veriblər. Ancaq maraqlı hal odur ki, konsertə təşrif buyuran tamaşaçıların əllərindəki fotoaparatlardan, eləcə də telefonlardan səhnəyə, məhz “50 Cent”in üzünə yönləndirilmiş çoxsaylı işıqlar reperi narahat etməyib. Əksində o, bundan məmnun olduğunu dilə gətirib.

“50 Cent”in Bakıdakı pərəstişkarları bu konsertdə ilk əvvəl Azərbaycanın “Dəyirman” qrupunun ifasının dinləyiblər. Ancaq “Dəyirman” səhnədə ifa edərkən, tamaşaçılar qapı arxasından onların ifasını dinləmək məcburiyyətində qalıblar. Yerli qrupun ifasından sonra isə xüsusi hazırlanmış video-rolik nümayiş olunub və “50 Cent” səhnəyə təşrif buyurub. Dünyanın ən bahalı reperi sayılan “50 Cent” Bakı tamaşaçıları qarşısında bir saata yaxın məşhur rep mahnılarını oxuyub. Hər konsertində olduğu kimi, Bakı səhnəsində də reper köynəyini, papağını, dəsmalını səhnədən tamaşaçılara atıb. “50 Cent”ə məxsus olan papağı, köynəyi və dəsmalı tutan tamaşaçılar isə sevinclərini gizlədə bilməyiblər. “50 Cent” hətta VİP bilet alan və bu konsertə 500 manat xərcləyən tamaşaçıları da əyləşməyə qoymayıb. O bütün tamaşaçıları onunla birgə ritm tutmağa və repi duymağa səsləyib. Hər zaman olduğu kimi Azərbaycan tamaşaçısı səhnəmizdə olan qonaq ifaçının istəyini ürəyində qoymayıb. Azərbaycan tamaşaçılarının marağını görən və yorulduğunu hiss edən əcnəbi reperlər yerli pərəstişkarların üstünə su da töküblər. Bu da “50 Cent” tərəfindən gözlənilməz bir hərəkət kimi qəbul olunub. “50 Cent”lə yanaşı konsertdə tanınmış rep qrupu “G-Unit”in məşhur simaları Lloyd Banks, Toni Yayo və DJ Who Kidd çıxış ediblər. “50 Cent”in çıxışından sonra, dünyada tanınmış rəqs brendi olan “Unidance”ın rəqqasları və azərbaycanlı Dj Mansur disko-proqramı davam etdiriblər.

Onu da bildirək ki, konserti işıqlandırmaq üçün yerli televiziya kanallarına da icazə verilməyib. Buna səbəb kimi isə “50 Cent”in konsertinin eksklüziv çəkiliş hüququnun məşhur MTV kanalına məxsus olduğu göstərilib.

Qeyd edək ki, “50 Cent2in Bakıya səfərinin təşkilatçısı “Korsika Lounge”, PR təşkilatçısı “Sky Group”, mid-agent isə “Mamedia” şirkəti olub. Konsert proqramının əsas məqsədi reperin «Before I Self Destruct» adı ilə satışa çıxardığı yeni albomunun tanıtımı olub.