Şou-biznes

Ana səhifə

Şou-biznes

Adil Kərimli: “Azərbaycanın “Eurovision-2010” müsabiqəsində birinciliyi satın alması ilə bağlı yazılanlar absurd iddiadır”

12 may 2010 14:54 (UTC +04:00)

Bakı. Ülkər Qasımova – APA. Son günlər Azərbaycanın “Eurovision-2010” müsabiqəsində birinciliyi satın alması ilə bağlı Türkiyə və Rusiya mətbuatında xəbərlər dərc olunur. “Eurovision” müsabiqəsinin Azərbaycan üzrə nümayəndə heyətinin rəhbəri Adil Kərimli APA-ya açıqlamasında yazılanların absurd olduğunu bildirib: “Bu hal “Eurovision” tarixində görünməmiş bir məsələdir. Bunu Azərbaycana aid etmək çox böyük yanlışlıqdır. Hər hansı digər iştirakçı ölkəyə şamil edilməsi də düzgün deyil. Bu iddiaları heç cür qəbul etmək olmaz”.

A. Kərimli bu məsələnin Azərbaycanla qardaşlıq əlaqələri olan Türkiyə mətbuatında geniş yayılmasına da münasibətini açıqlayıb: “Mətbuat mətbuatdır. Medianın vətənindən söhbət gedə bilməz. Bunların hamısı bir prinsipə xidmət edir. Media qarşısına sədd qoymaq olmaz, istənilən mətbuatda bu cür yazıların çap edilməsi mümkündür. Bu iddialar ancaq jurnalistin, mətbuat nümayəndəsinin subyektiv fikrindən ibarət ola bilər. Konkret hansısa məqsədin olduğunu demək çətindir. Bunların hamısı mülahizələrdir, hər kəs öz fikrini söyləyir. Bu barədə danışmağa da dəyməz. O qədər absurd bir məsələdir ki... Ancaq unutmaq olmaz ki, hər hansı subyektiv fikrin arxasında hansısa hiylə də dura bilər”.

A. Kərimli Azərbaycanın 55-ci “Eurovision” müsabiqəsində hər iştirakçı üçün potensial və güclü rəqib olduğuna diqqət çəkib: “Bu il həqiqətən də Azərbaycan əsas iddiaçılardan biridir. Hər iştirakçı dövlət bizim təmsilçimizi özünə güclü rəqib sayır. Həqiqətən də həm ifaçımız, həm də mahnımız yüksək səviyyədə təqdim olunur”.

Adil Kərimli iddialarla bağlı İctimai Televiziya və Radio Verilişləri Şirkətinin araşdırma aparmayacağını da söyləyib: “Bu məsələni araşdırmağa belə dəyməz. Buna ehtiyac duymuruq”.

eurovision_səfurə