Şou-biznes

Ana səhifə

Şou-biznes

Sofo Nijaradze: «Bu səhnədə çıxış edib zövq almamaq mümkün deyil»

20 may 2010 00:38 (UTC +04:00)

Norveç, Oslo - Ülkər Qasımova – APA. Norveçin paytaxtı Osloda keçirilən “Eurovision-2010” Mahnı Müsabiqəsində Gürcüstanı təmsil edən Sofo Nijaradze layiqli yer qazanacağına inanır. Təmsilçi APA-nın Norveçə ezam olunmuş əməkdaşına verdiyi açıqlamasında müsabiqədə uğur qazanması üçün lazımi hazırlıqlardan keçdiyini deyib: “Düzdür, bu zamana kimi çox hazırlaşmışıq, ancaq hələ də bu hazırlıqlar davam edir. Bizdə tam hazırlaşmağa yetəri qədər vaxt var. Bu gün “Telenor Arena”da ilk məşqim keçirildi və bu səhnədə olmaq çox gözəl bir hissdir. Səhnədəki avadanlıqlar da yetəri qədər rahatdır. Bu səhnəyə çıxıb zövq almamaq mümkün deyil. Bu cür səhnədə qəlbini açıb insanlarla açıq şəkildə emosiyaları bölüşə bilərsən”.

Sofo Nijaradze onu da deyib ki, bu müsabiqədə iştirak həyatı və yaradıcılığı üçün önəmli bir mərhələdir: “Gələcək yaradıcılığım üçün də bu müsabiqədə iştirak çox şey dəyişəcək. “Eurovision” elə bir müsbət rəyli müsabiqədir ki, bunun başlanğıcı kimi sonrası da gözəl olur. Müsabiqədə iştirakdan sonra da yeni çıxan mahnılarımı tamaşaçılar izləyəcək. Bu artıq müğənni üçün yaxşı göstəricidir ”.

Gürcüstan təmsilçisinin fikrincə, müsabiqədə hələ ki, kimin neçənci olacağını əvvəlcədən demək mümkün deyil: “Ümumiyyətlə bu proses o qədər sürətli keçir ki, çox şeylər dəyişə bilər. Düzdür, ilklər sırasında olmağı hamı istəyir. Ancaq mənim əsas məqsədim ölkəmi layiqli təmsil etməkdir. Səsi isə tamaşaçılar verir və nəticə onların verəcəyi səslərə görə müəyyənləşdirəcək”.

Qeyd edək ki, Gürcüstan təmsilçisi Sofo Nijaradze mayın 27-də keçiriləcək II yarımfinalda çıxış edəcək. Təmsilçi “Shine” mahnısı ilə ölkəsini təmsil edəcək.