Şou-biznes

Ana səhifə

Şou-biznes

“Eurovision” müsabiqəsinin icraçı direktoru Svante Stokselius: “Azərbaycan təmsilçisinin oxuyacağı mahnı çox gözəl ritm üzərində qurulmuş, yaddalan və seçilən bir mahnıdır” - MÜSAHİBƏ – FOTOSESSIYA

25 may 2010 07:04 (UTC +04:00)

Oslo. Ülkər Qasımova – APA. “Eurovision” müsabiqəsinin icraçı direktoru Svante Stokseliusun APA-nın Norveçə ezam olunmuş müxbirinə eksklüziv müsahibəsi

- Norveçin 55-ci “Eurovision” müsabiqəsinin təşkilatçılığı Sizi nə dərəcədə qane edir?

- Norveç bu müsabiqənin hazırlığına yetəri qədər erkən başlayıb və son tarixə qədər qarşılarına qoyduqları bütün işləri yüksək səviyyədə yerinə yeitirə bilib. Biz artıq bu şouya tamamilə hazırıq.

- Ötən ilə nisbətdə bu il müsabiqədə iştirakçı ölkələrin sayı nisbətən azalıb. Deyilənlərə görə, bu halın baş verməsi dünyada baş verən iqtisadi böhranla əlaqədardır. Müsabiqədə təmsilçi ölkələri azalması halı Sizi məyus etmir ki?

- Hər il “Eurovision” müsabiqəsində iştirak edən ölkələrin sayı 40 ətrafında olur. Biz belə düşünürük ki, bu il 39 iştirakçı ölkə var və sayın azalmasının “Eurovision” müsabiqəsinin təşkilatçılığı ilə əlaqəsi yoxdur. Bu həmin ölkələrin daxili problemləri ilə əlaqədardır. Əminəm ki, gələn il 40-cı ölkədə müsabiqəyə yenidən qayıdacaq.

- Ehtimallara görə, “Eurovision Junior Song” müsabiqəsinə marağın az olması bu müsabiqənin sonrakı illərdə keçirilməməsinə səbəb ola bilər. Bu barədə Sizin düşüncəniz necədir?

- Bu heç də düzgün məlumat deyil. Bizim “Eurovision Junior” yarışmasını davam etmək niyyətimiz var və hətta buna hazırlıqlar belə başlayıb. Bu ilin noyabrında “Junior Eurovision” Belarusun Minsk şəhərində baş tutacaq. Buna ciddi hazırlıqlar görülür.

- Ötən il “Eurovision Dance” müsabiqəsinin Azərbaycanın paytaxtı Bakıda keçiriləcəyi xəbəri yayıldı. Sonradan isə tarix dəyişdirilərək 2011-ci ilə salındı. “Eurovision Dance -2011” yarışması Azərbaycanda keçiriləcəkmi?

- Əgər Azərbaycan bu rəqs müsabiqəsini keçirməyə namizədliyini irəli sürsə və bu müsabiqəni keçirməyə hazır olduğunu sübuta yetirsə, niyə də olmasın? Hətta bu hal gələcək illərdə “Junior Eurovision”a da şamil edilə bilər. Gələcəkdə hər iki müsabiqənin Azərbaycanın paytaxtı Bakıda keçirilməsi mümkündür.

- Uzun illərdir ki, “Eurovision” müsabiqəsinə rəhbərlik edirsiniz. Bu iş artıq Sizə yorucu gəlmir ki?

- Qətiyyən yorucu deyil. Çünki hər il bu müsabiqə daha maraqlı və müasir keçirilir. Bu darıxdırıcı iş deyil, axı hər il görülən iş eyni motivli olmur. Hər il müsabiqə daha müasir və tam fərqli olur, o səbəbdən də yorulmaq mümkün deyil.

- Çox güman ki, Avropanın bütün ölkələrini özündə birləşdirən bir müsabiqəyə rəhbərlik etmək də çox böyük məsuliyyət tələb edir?

- Əlbəttə ki… Bu çox böyük bir məsuliyyətdir. Çünki burada tək özünün yox, çoxsaylı ölkələrin işini görürsən, onları razı salmalısan və bu, mükəmməl olmalıdır. Hər il bu müsabiqədən çox böyük zövq alıram. Bu, çox həyəcanlandırıcıdr. Uzun illərdir bu müsabiqəyə rəhbərlik edirəm və hələ nə qədər davam edəcəyini də bilmirəm. Və hər il bu yarışmanın nəticəsini hamı ilə bərabər gözləmək və nəticəni bilmək çox həyəcanlıdır ki, bu da başqa bir həyəcandır. Müxtəlif dövlətlərdən, dinlərdən, fərqli dünya baxışı olan insanlarla bir yerdə işləmək, onlarla bir iş üzərində işləmək maraqlı və həyəcanlandırıcıdır.

- Yəni heç bir zaman müsabiqənin sonucunu öncədən bilmirsiniz?

- Bunu mən necə bilə bilərəm? Mən də nəticəni bütün tamaşçılarla bir anda bilirəm. Çünki yarımfinal və final ərəfəsində təşkialtçı deyil, artıq izləyici oluram. Hər il olduğu kimi artıq favoritim olmasına baxmayaraq nəticə mənim üçün də sürpriz olacaq.

- “Eurovision-2010” müsabiqəsində birinciliyin hansısa yollarla alındığı barədə də fikirlər oldu. Bu söz-söhbətlərin yaranmasına hansı hal şərait yarada bilər? Sizcə bu cür danışıqlar müsabiqənin obyektivliyinə şübhə yaratmaq demək deyil ki?

- “Eurovision” müsabiqəsinin obyektivliyinə şübhə yaradacaq heç bir haldan söhbət gedə bilməz. Bütün dünyada izlənən və maraq doğuran “Eurovision” müsabiqəsinin obyektivliyini şübhə altına salmaq istəyənlər əlbəttə ki var və bu cür söz-söhbətlər də bu istiqamətdə yönəlmiş səylərdir. O səylər ki, heç bir fakta dəlalət etmir. Ona görə də bu səylər hər zaman nəticəsiz qalacaq. “Eurovision” müsabiqəsi ilk yarandığı vaxtdan obyektiv olub və bundan sonra neçə il davam etaə belə heç zaman qeri-obyektivlikdən söhbət gedə bilməz.

- Ötən ilin sonu “Eurovision TV”nin direktoru Biorn Erikson təqaüdə çıxdı. Həmin vəzifəyə artıq təyinat olubmu?

- Bəli, cənab Biorn Erikson artıq öz ölkəsinə qayıtdı və təqaüdə çıxdı. Artıq həmin vəzifəyə təyinat olub və Georgian Frank “Eurovision TV”yə rəhbərlik edir.

- Ötən ilki problemlərdən sonra Azərbaycanın müsabiqədə builki iştirakını necə qiymətləndirisiniz? Bildiyimiz kimi EBU Azərbaycanı cərimə etmişdi və bu halın təkrarı ölkəmizin müsabiqədən üç illik uzaqlaşdırılması ilə nəticələnə bilər…

- Ümidvaram ki, nə bu il, nə də ki, gələcək illərdə iştirakçı ölkə və təşkilatçılar belə bir problemlə bir daha üz-üzə qalmayacaq. Bu il Azərbaycanın çox istedadlı ifaçısı və gözəl mahnısı var. Mən Azərbaycana müsabiqədə uğurlar arzulayıram.

- Müsabiqə rəhbəri olaraq builki yarışmada favoritiniz varmı?

- Əlbəttə favoritim var və adını da çəkə bilərdim. Ancaq mənim favotimin kim olması heç bir önəm daşımır. Bütün mahnılara qulaq asmışam və mahnıların içində layiqli mahnılar var. Ümid edirəm ki, ən yaxşı mahnı müsabiqədə qalib gələcək.

- Azərbaycanın builki müsabiqədə təmsilçisi və mahnısı haqqında nə düşünürsünüz?

- Düşünürəm ki, çox gözəl ritm üzərində qurulmuş, yaddalan və seçilən bir mahnıdır. Təmsilçiniz də çox istedadlı gənc xanımdır. Azərbaycana müsabiqədə çox böyük uğur diləyirəm.