Şou-biznes

Ana səhifə

Şou-biznes

Aleksandr Rıbak: “Əminəm ki, bu il də ən güclü mahnı müsabiqənin qalibi olacaq” - MÜSAHIBƏ

Aleksandr Rıbak: “Əminəm ki, bu il də ən güclü mahnı müsabiqənin qalibi olacaq” - <font color=red>MÜSAHIBƏ </font>

28 may 2010 15:18 (UTC +04:00)

- Artıq “Eurovision-2010” mahnı müsabiqəsinin hər iki yarımfinalı geridə qalıb. Yarımfinal kosnertlərinin təşkilindən razı qaldınızmı?

- Hər iki yarımfinal gözəl və yüksək səviyyədə keçirildi. Ümumiyyətlə, Norveç bu yarışmanı həyata keçirməyə çox zaman və çox zəhmət sərf edib. Sözsüz ki, hər şey yüksək səviyyədə olmalıdır, başqa cür ola da bilməz. İstərdim ki, hər bir qalib ölkə bu müsabiqəyə bu cür ciddi yanaşsın və layiqli ev sahibliyi etsin.

- Yəqin ki, hər iki yarımfinalı izləmisiz. Nəticələr sizi qane etdimi?

- Bu cür məsələlərlə bağlı çox açıq danışa bilmərəm. Rəy və ya fikir bildirmək çox qəliz məsələdir. Ancaq hər iki yarımfinalın nəticəsi məni qane etdi. Hər şey finaldan asılıdır. Əminəm ki, ötənilki kimi, bu il də ən güclü mahnı müsabiqənin qalibi olacaq.

- İki gündən sonra sizin yerinizi başqa bir insanın tutacağından təsirlənirsinizmi?

- Düşünürəm ki, nəhayət ki, kimsə mənim çiyinlərimdəki bu məsuliyyəti öz üzərinə götürəcək və mən rahat nəfəs alacağam. Nə yaxşı ki, qalib təmsilçi mənim həyatımın yox, məhz bu mükafatın yeni sahibi olacaq. Bununla da çiyinlərimdən məsuliyyəti götürəcək və bu çox gözəl haldır. Buna təsirlənmək yox, sevinmək lazımdır. Axı mən yaşayıram və yaradıram...

- Deyəsən “Eurovision-2010” müsabiqəsinin təmsilçiləri arasında Almaniyaya daha çox pərəstiş edirsiniz?

- Bəli, Almaniyanın təmsilçisi də, mahnısı da çox xoşuma gəlir. Bu il Almaniya favoritimdir. Ancaq tək Almaniyaya yox, Belarus, Norveç təmsilçisinə səs göndərəcəyəm. Ona görə ki, əslən Belarusdanam və uzun illərdir Norveçdə yaşayıram. O səbəbdən də üç ölkə təmsilçisinin xeyrinə sms göndərəcəyəm.

- Artıq qalibiyyətinizdən bir il keçib. Bu qalibiyyət ili həyatınızda nə isə dəyişə bilib?

- Mən bu müsabiqədə qalib gələnə kimi çox qərəzli idim, ancaq qələbədən sonra dəyişdim və buna görə “Eurovision” müsabiqəsinə borcluyam. Bu müsabiqədə qalib gələndən sonra bir çox mədəniyyətlərlə tanış oldum və onları məhz özlərinə görə qiymətləndirməyi öyrəndim. Bu da məndə yenilik oldu.

- 54 ildən sonra “Eurovision” müsabiqəsi tarixində rekord bal toplamaq sizə nəsib olub. Sizcə, bu rekordu bu il yeniləyən olacaqmı?

- Əlbəttə ki, hər şey mümkündür. Ancaq 54 illik tarixi olan bu cür məşhur müsabiqədə buna nail olan ilk təmsilçi olmaq da böyük uğurdur. Əlbəttə ki, istərdim ki, bu rekord göstərici yenilənsin, bu il də olmasa, növbəti illərdə bu mümkündür. Ancaq çox istərdim ki, bu rekord məhz mahnıya görə əldə olunsun.

- Deyirlər, “Eurovision” müsabiqəsində iştirak edəndən və qalib gələndən sonra müğənninin özünü reklam etmək üçün bir ili olur. Yəni, növbəti müsabiqə keçirilənə kimi bu uğur onunla olur. Düşünmürsünüz ki, yeni qalibin kölgəsində qalacaqsız?

- Qəti şəkildə bu fikirlə razı deyiləm. Mən Aleksandr Rıbakam və builki qalib də bir başqası olacaq. Doğrudur, müsabiqədə qalibiyyət qazanmaq çox böyük bir reklam və piardır. Ancaq mən müsabiqədə qalibiyyətimlə özümü heç zaman reklam etməyə cəhd göstərməmişəm. Hər bir kəs mənim sənətimi sevir, məndən mahnı istəyir. Mən “Eurovision-2010” müsabiqəsinin qalibi olandan sonra da sönməyəcəyəm. Çünki mən boş oturub qalibiyyətlə özümü reklam edənlərdən deyiləm. Yeni albom üzərində işləyirəm və iyunun sonunda bu albom işıq üzü görəcək. Artıq albomumu neçə minlərlə insan arzulayır. Məgər bu unudulmaqdır?

- Bu günlərdə builki müsabiqənin qalibinə təqdim edəcəyiniz mükafatın təqdimatını keçirdiniz...

- Bəli, bu mikrofon billurdan hazırlanıb. Çox maraqlı və gözəl təsir bağışlayır. Əminəm ki, bu billur mikrofon layiqli təmsilçiyə nəsib olacaq.

- Bir daha “Eurovision” müsabiqəsində iştirak haqqında düşünürsünüzmü?

- Yaxın illərdə bunu arzulamıram. Ancaq uzaq gələcəklə bağlı dəqiq bir söz deyə bilmərəm. Bu yol çox çətin və məsuliyyətli yoldur. Bu məsuliyyəti yenidən üzərimə götürmək və bu gərgin iş qrafiki ilə hazırlaşmaq mənə hələ ki, çətin gəlir.

- Sabah finalda birincilik uğrunda mübarizə aparacaq 25 ölkə təmsilçisinə qalib kimi məsləhətiniz nədir?

- Hər birinə, xüsusi ilə Almaniyaya uğurlar diləyirəm. Sadəcə bacarıqlarını ortaya qoyub gözəl perfomans nümayiş etdirsinlər. Nəticənin hamının ürəyindən xəbər verəcəyini düşünürəm. Sabah hər şey məlum olacaq.