Şou-biznes

Ana səhifə

Şou-biznes

“Eurovision” müsabiqəsinin ilk qalibi Lis Assia: “Builki müsabiqədə qəlbimin birincisi Azərbaycandır” – MÜSAHİBƏ – FOTOSESSİYA

“Eurovision” müsabiqəsinin ilk qalibi Lis Assia: “Builki müsabiqədə qəlbimin birincisi Azərbaycandır” – <font color=red>MÜSAHİBƏ – FOTOSESSİYA </font>

29 may 2010 13:06 (UTC +04:00)

Oslo. Ülkər Qasımova – APA. 1956-cı ildə “Eurovision” müsabiqəsinin ilk qalibi Lis Assianın APA-nın Norveçə ezam olunmuş müxbirinə eksklüziv müsahibəsi

- Bu gün “Eurovision-2010” mahnı müsabiqəsinin finalından nə gözləyirsiniz? Finalda qalibin kim olacağını güman edirsiniz?

- Bu ilki yarışmada çoxlu gözəl səslər və ifalar var. Bugünkü finaldan çox böyük şey gözləyirəm. Uzun illərdən bəri yeganə il bu ildir ki, mən öncədən qalibin kim olacağını söyləməyə çətinlik çəkirəm. Əgər məndən asılı olsaydı, Azərbaycanın mahnısını birinci edərdim. Bu mahnı çox yaddaqalan və unudulmazdır. Həm çıxış, həm də mahnı çox seçiləndir. Ancaq mən xalq deyiləm, mahnıların qiymətini tamaşaçı kütləsi verəcək. Mən sizin mahnını qəlbən çox sevirəm.

- Bu cür möhtəşəm bir müsabiqənin ilk qalibi olmaq necə bir hissdir və bu müsabiqədə qalib olmaq gələcək karyera üçün çoxmu önəmlidir?

- Mənim üçün müsabiqədə qaliblik o qədər də böyük rol oynamırdı. Çünki müsabiqədə iştiraka qədər də mənim karyeram var idi və yetəri qədər tanınırdım. Əsas istəyim ölkəmə bu müsabiqədə uğur qazandırmaq idi və bunu bacardım. O illərdə Amerikada çox tanınmış bir səsyazma studiyası ilə 30 illik müqavilə bağlamışdım. Elə bu müqavilə əsasında da bu müddətdə Amerikada işlədim. 18 dil bilirdim, bütün bu dillərdə də musiqi ifa etmişəm və bu səbəbdən çoxsaylı ölkələrdə yetəri qədər tanınmışam və dünyanın bir çox yerlərində də olmuşdum, ona görə də bu müsabiqədə qalibiyyət mənim üçün çox da böyük bir şey kəsb etmirdi. Əlbəttə ki, bu müsabiqədə olmaq çox yaxşı bir hissdir, insanlar səni görür, mətbuatla əlaqəyə girirsən. Evdə otursan, bunların heç biri baş verməyəcək, ancaq müsabiqə daxilində bu çox yaxşıdır. Bu müsabiqəyə görə çox münasibətlərim yarandı, məhz o münasibətlərin hesabına çox işlər gördüm, filmlərdə çəkildim.

- “Eurovision” musiqi yarışmaları arasında ən uzunömürlü bir müsabiqədir. 55 illik tarixi olan bir müsabiqədə ötən illərlə müqayisədə çox dəyişiklər hiss edirsiniz?

- Tamamilə eyni “Eurovision” deyil, ancaq builki “Eurovision”u bir qədər geriyə qayıdış kimi görürəm. Bizim vaxtımızda səhnədə daha çox qruplar çıxış edərdi. Fevralda Ermənistanda olmuşam və bu ölkənin təmsilçisi Eva Rivasın mahnısını dinləmişəm. Yaxşı mahnıdır, ancaq dediyim kimi, musiqi qabarır, musiqinin təqdimatı isə geridə qalır. Ötən il mən Rıbakı görən kimi demişdim ki, o qalib olacaq, hətta onun özünə dedim ki, sən qalib gələcəksən, çünki o, şounu necə yaratmağı çox gözəl bilir. Ötən il onun məni səhnəyə qucağında gətirməsi də bir şou idi. O bunu çox gözəl bacarır. Şou qabarıq olanda ifaçı arxa planda qalır ki, bu da müsabiqədə əlverişli hal deyil. Düşünürəm ki, bu festival sənətçi və səs yarışması olmalıdır. Bu il də çox səslər birincilik uğrunda mübarizə aparır.

- Adətən müsabiqədə birincilik qazanan təmsilçilər “ulduz xəstəliyi”nə tutulur. Siz isə bu qalibiyyətin əsasını qoyduğunuz halda sadəliyinizlə seçilirsiniz...

- Mən insanları və musiqini çox sevirəm. Bu, insanın öz xasiyyətindən asılı olan bir şeydir. Mən heç zaman bu xəstəliyə tutulmamışam, bu müsabiqədə qalibiyyət zamanı niyə dəyişməli idim ki? Əgər o insanlar, tamaşaçılar məni yüksəklərə qaldırıb dağ başına qoyursa, mən onların qarşısında necə sadə olmayım? Mən hər zaman eyni xasiyyətdəyəm.

- Bu gün finalda qalib gələcək təmsilçiyə məsləhətiniz nədir?

- Qalib öz üzərində çox gərgin işləməli, qazandığı zirvəni əlində saxlamalıdır. Zirvə qazanmaq çox asandır, ancaq onu əldə saxlamaq çox çətin bir şeydir. Bu müsabiqədə qalibiyyət möhtəşəm bir şeydir. Ancaq bu, mənim üçün o qədər də önəmli olmayıb. Birinci qalib olduğum üçün hələ də mənim adım bu müsabiqə ətrafında hallanır, mən bundan qaça bilmirəm. 40 solisti bir dam altında yığan ikinci bir festival yoxdur, bu yeganə belə müsabiqədir, ancaq “Eurovision” bunu bacarır.

- 55 il öncə qalib olanda düşünürdünüz ki, “Eurovision” bu cür möhtəşəm bir şouya çevriləcək və bütün dünyanı özünə sehrləyəcək?

- Tamamilə ağlıma belə gəlməzdi. İştirak etdim və qalib gəldim, ancaq illər getdikcə müsabiqənin daha da möhtəşəmliyinin şahidi oldum. Bu da məni çox sevindirir. Yadımdadır, Selin Diona bu müsabiqədə mən kömək etmişəm. O, müsabiqədə iştirakdan əvvəl çox pis formada idi, ancaq mən ona yardım etdim. Çox gözəl səsi var idi, səhnədə elə bir ifa göstərdi ki, o ifa hələ də hamının yadındadır. Mən bu yarışmanın ilk qalibi olduğum üçün müsabiqə mənim adıma assosiasiyalaşır.

- Uzun illərin təcrübəsinə sahibsiniz. Tam səmimi olaraq deyə bilərsinizmi builki finalçılar arasında qəlbinizin birincisi kimdir?

- Qəlbimin birincisi Azərbaycandır. Bu gün finalda birinci olaraq Azərbaycanı görürəm. Bu gün bütün qəlbimlə Azərbaycana dua edəcəyəm və səs göndərəcəyəm. Hətta Azərbaycan üçün şam da yandıracağam ki, layiqli yer məhz sizin olsun. Ancaq ümumilikdə Danimarkanın mahnısını da bəyənirəm. Dodaqaltı bu mahnını mızıldanıram, həyatımın 13 ili bu ölkədə keçib. Norveç, İrlandiya da çox xoşuma gəlir. Digər mahnıları xatırlamaq çətindir, ancaq Danimarka həmişə mənim yadımdadır. Yunanıstanın mahnısı da uğurlu, başqa bir enerjiyə qadir bir mahnıdır. Ancaq yenə deyirəm - qəlbimin birincisi Azərbaycandır.