Şou-biznes

Ana səhifə

Şou-biznes

“Eurovision-2010” müsabiqəsinin keçirildiyi Oslonun “Telenor Arena”sı qarşısında çoxsaylı Azərbaycan bayraqları dalğalanır - FOTOSESSIYA

“Eurovision-2010” müsabiqəsinin keçirildiyi Oslonun “Telenor Arena”sı qarşısında çoxsaylı Azərbaycan bayraqları dalğalanır - <font color=red>FOTOSESSIYA</font>

29 may 2010 14:31 (UTC +04:00)

Oslo. Ülkər Qasımova – APA. Norveçin paytaxtı Osloda “Eurovision-2010” mahnı müsabiqəsinin final konsertinə ciddi hazırlıq başlayıb.

APA-nın Norveçə ezam olunmuş müxbirinin məlumatına görə, bu gün axşam “Telenor Arena”da keçiriləcək müsabiqənin final həyəcanını izləmək üçün çoxsaylı tamaşaçılar arenanın qarşısına toplaşıb. Final günü Osloda güclü yağış və dolunun yağması isə maraqla qarşılanıb.

Hazırda “Telenor Arena”nın qarşısında çoxsaylı Azərbaycan bayraqları dalğalanır. Həm azərbaycanlılar, həm də Azərbaycanı dəstəkləyən xarici vətəndaşlar bayrağımızla birgə arenanın qarşısında səbirsizliklə final həyəcanını gözləyirlər. Çoxsaylı izləyicilərin, eləcə də müsabiqə təmsilçilərinin fikrincə, bu gün Azərbaycan qalibiyyət sevincini yaşayacaq. Final konserti ilə əlaqədar olaraq “Telenor Arena” ətrafında nəqliyyatın hərəkəti məhdudlaşdırılıb. Eləcə də arena qarşısında çoxsaylı mühafizə xidməti toplaşıb ki, bu da müsabiqəyə gələn tamaşaçıların təhlükəsizliyini təmin etmək məqsədi daşıyır.

Final konsertində Azərbaycan təmsilçisi Səfurə Əlizadəyə dəstək olmaq üçün Azərbaycandan çoxsaylı insanlar Norveçin paytaxtına gəliblər. Hətta xaricdə yaşayan azərbaycanlılar da qələbə sevinci yaşamaq üçün Oslodadırlar. Final konsertində təxminən 200-ə yaxın həmyerlimiz tamaşaçı qismində iştirak edəcək.

Səfurə Əlizadə Artıq final çıxışına sayıla saatlar qalmış APA-nın Norveçə ezam olunmuş müxbirinə açıqlamasında özünü yaxşı hiss etdiyini və final çıxışına tama hazır olduğunu açıqlayıb. O, Azərbaycan xalqından dəstək gözlədiyini deyib: “Mən bu gün Azərbaycan xalqından dəstək gözləyirəm və hər birinizdən mənə arxa olmağınızı istəyirəm. Dünya azərbaycanlılarından və xaricdə yaşayan insanlardan səs gözləyirəm. Bu gün Azərbaycana layiq çıxış edəcəyimə söz verirəm. Azərbaycanı ən yüksək səviyyədə təmsil etməyim üçün əlimdən-gələni edəcəyəm. Siz də məndən dəstəyinizi əsirgəməyin. Bu günə kimi necə dəstək olmusunuzsa, bundan sonra da davam edin. Bu gün Azərbaycana qələbə gətirmək arzusundayam və Allaha bunun üçün dua edirəm”.

Qeyd edək ki, bir neçə saatdan sonra Oslonun “Telenor Arena”sında “Eurovision-2010” müsabiqəsinin final konserti keçiriləcək. Finalda 25 ölkə birincilik uğrunda mübarizə aparacaq. Azərbaycan təmsilçisi “Eurovision-2010” müsabiqəsində 25 ölkə təmsilçisi arasında çıxış edəcək 1-ci təmsilçi olacaq. Azərbaycanda yaşayan vətəndaşların nəzərinə çatdıraq ki, Azərbaycandan başqa finalda çıxış edəcək təmsilçilərdən kimi bəyənsəniz, onun çıxış nömrəsini yazıb 9450 SMS nömrəsinə göndərə bilərsiniz. Azərbaycan təmsilçisini dəstəkləmək üçün isə digər ölkələrdə yaşayan həmyerlilərimiz və Azərbaycan mahnısını bəyənən xarici vətəndaşlar 1 yazıb hər ölkəyə təqdim olunmuş SMS nömrəsinə göndərməlidirlər. Bu gün final konserti başa çatdıqdan sonra “Eurovision-2010” müsabiqəsində təmsil olunan 39 ölkə ilə canlı bağlantı yaradılacaq və xallar elan olunacaq.