Şou-biznes

Ana səhifə

Şou-biznes

“Eurovision-2011” müsabiqəsi üçün Almaniyanın Berlin, Hamburq, Düsseldorf və Hannover şəhərləri arasında seçim edilir

21 avqust 2010 11:07 (UTC +04:00)

Avropa Yayım Birliyinin və ev sahibi olan NDR-in qərarı yaxın həftələrdə açıqlanacaq

Bakı. Ülkər Qasımova-APA. Gələn ilin mayında Almaniyada keçiriləcək “Eurovision-2011” Mahnı Müsabiqəsinin həyata keçirilməsi üçün ölkənin dörd şəhəri namizəddir. APA-nın müsabiqənin rəsmi internet saytına istinadən yaydığı xəbərə görə, namizəd şəhərlər - Berlin, Hamburq, Düsseldorf və Hannoverdir. Müsabiqəyə ev sahibliyi edəcək Almaniyanın “NDR” kanalı və Avropa Yayım Birliyi yaxın həftələrdə müsabiqənin bu şəhərlərdən hansında keçirilməsi barədə qərar qəbul edəcək.
NDR-in rəsmi nümayəndəsi Tomas Şrayber (Thomas Schreiber) bildirib ki, şəhərlər haqqında təfərrüatlı planlar hazırlanıb və təqdim edilib: “Biz də bu şəhərlərdən hansını seçmək üçün araşdırma aparacağıq. Hansı şəhərin qalib gəlməsindən asılı olmayaraq Almaniya bütün dünyadan olan tamaşaçılar üçün gözəl ev sahibi olacaq. Biz bunun üçün əlimizdən gələni edəcəyik”.
Əlavə edək ki, Almaniyanın paytaxtı olan Berlin ölkənin şimal-şərqinə yerləşir və 3,5 milyon əhalisi var. Avropa Birliyinin yeddinci, Almaniyanın isə ikinci böyük şəhəri olan Hamburqda 1,7 milyon əhali yaşayır. Qeyd etmək lazımdır ki, gələn il müsabiqəyə ev sahibliyi edəcək “NDR” məhz bu şəhərdə yerləşir. Almaniyanın mühüm iqtisadi mərkəzi hesab olunan Düsseldorf şəhərinin 590 min, “Eurovision-2010” müsabiqəsinin qalibi olan Lena Mayerin anadan olduğu Hannover şəhərinin isə 520 min əhalisi var.
Qeyd edək ki, “Eurovision-2011” Mahnı Müsabiqəsi gələn ilin 10, 12 və 14 may tarixlərində sadalanan bu 4 şəhərdən birində baş tutacaq.