Şou-biznes

Şou-biznes

Xəyyam Mirzəzadə: “Əli İsa Cabbarov fırıldaqçıdır”

26 avqust 2010 11:01 (UTC +04:00)

Bakı. Ülkər Qasımova – APA. “Bu filmlərə musiqi yazmağım üçün mənə qonorar veriblər. Mən isə tələb edirəm ki, o filmləri satan şəxs qanuna uyğun olaraq qazandığı pulun müəyyən faizini mənə versin. Nəinki mənə, eyni zamanda rejissora, operatora da. Əli İsa Cabbarov sadəcə olaraq fırıldaqçıdır”. Bu sözləri APA-ya açıqlamasında Azərbaycanın xalq artisti, bəstəkar Xəyyam Mirzəzadə deyib. X. Mirzəzadə bu filmləri xarici telekanallara satdığı və satışdan qazandığı puldan ona faiz vermədiyi üçün “Dərviş” Prodüser Mərkəzinin rəhbəri, “Ev” və “Düyün” filmlərinin prodüseri Əli İsa Cabbarovla bağlı məhkəməyə müraciət edib.

Xalq artisti 2007-ci və 2008-ci illərin istehsalı olan bu filmlərlə əlaqədar bir ildir məhkəmə prosesinin davam etdiyini söyləyib: “Bu məsələyə dair Yasamal Məhkəməsi də, Apellyasiya Məhkəməsi də qərar çıxarıb. O, filmləri iki ölkəyə satıb. Biz hələ aydınlaşdıracağıq ki, filmləri başqa hara satıb. Məhkəmənin qərarına görə 3 min manat ödəməlidir. Eyni zamanda İsveçdən məktub almışıq ki, bəstəkarın pulunu vermək lazımdır”.

Xəyyam Mirzəzadə bir daha bu cür insanlarla iş görməyəcəyini vurğulayıb: “Mən bir daha bu cür fırıldaqçılarla iş görməyəcəyəm. Mənim məhkəmə işinə baş qoşmaqda məqsədim odur ki, bu insanlar bir daha belə iş tuta bilməsinlər. Mən hüquqlarımı müdafiə etməyi bacarıram, o birilər yazıqdırlar axı. Mən qayda-qanunu bilirəm və tələb edirəm. Bütün hakimlər, hüquqşünaslar mənim bu işdə haqlı olduğumu bildirirlər. Bir ildir bu iş gedir, gündə bir manat qoysaydı, pulum düzəlmişdi”.

Məsələ ilə əlaqədar qarşı tərəfin də mövqeyini öyrəndik. Ə. İ. Cabbarov öncə münasibət bildirsə də, sonradan redaksiyamıza zəng edərək mövqeyinin işıqlandırılmamasını istədi. Biz də peşə qaydalarına sadiq qalaraq onun tələbini həyata keçiririk.

Qeyd edək ki, Ə. İ. Cabbarov məhkəmənin qərarından kasasiya şikayəti verib.