Şou-biznes

Ana səhifə

Şou-biznes

“Best model of Azerbaijan-2010” yarışmasında xoşagəlməz məqamlar yaşanıb – FOTOSESSİYA

“Best model of Azerbaijan-2010” yarışmasında xoşagəlməz məqamlar yaşanıb – <font color=red>FOTOSESSİYA </font>

23 oktyabr 2010 09:42 (UTC +04:00)

Bakı. Ülkər Qasımova - APA. Oktyabrın 22-də “Best model of Azerbaijan-2010” müsabiqəsinin final şousu keçirilib. APA-nın məlumatına görə, builki yarışma Azərbaycanda vəfat edən türkiyəli biznesmen Nahid Kabakçıya ithaf olunub. Stilist Anar Ağakişiyev və foto-model Validə Abbasovanın prezidentliyi ilə düzənlənən mərasimdə müsabiqənin qalibləri məlum olub. Mərasim bəzi səbəblərdən deyildiyi vaxtdan iki saat gec başlayıb. Bu səbəblərdən biri isə müsabiqənin münsiflər heyəti üzvlərinin mərasimə gec qatılması olub.

Yarışmada iştirak etmək üçün Türkiyədən Azərbaycana gələn və səhhətində ciddi problemlər yaranan “Best model of the world” yarışmasının prezidenti Erkan Özərman da həkimlərin etirazına baxmayaraq gecəyə qatılıb. O, tədbirə xalq artisti Aygün Kazımova ilə birgə gəlib. Erkan Özərmanın həkimi də onun yanında olub. Mərasimdə Erkan Özərmanın təqdim olunmaması və ona söz verilməməsi yarışma prezidentinin gecəni yarımçıq tərk etməsi ilə nəticələnib. Belə ki, bir saata yaxın final şousunda çətinliklə oturan Erkan Özərman təqdim olunmadığını görüb, “Bu nə rəzalətdir, mən gedirəm” sözlərini deyərək, həkiminin yardımı ilə tədbiri tərk edib. Onunla birlikdə A. Kazımova da mərasimdən yarımçıq çıxıb.

“Best model of Azerbaijan-2010” müsabiqəsinin aparıcılığı Murad Arif və Səbinə Babayevaya həvalə olunub. Müsabiqədə 10 qız və 10 oğlan model arasından “Miss Azərbaycan-2006”, “World Bikini Model 2008” Günay Musayeva və Azər Ağakişiyev qalib elan olunublar. Onlar Azərbaycanı bu ilin dekabrında keçiriləcək “Best model of the World-2010” yarışmasında təmsil edəcəklər.

Lakin müsabiqənin nəticəsi ilə razılaşmayan Validə Abbasova zalı tərk edib və birinciliyin satıldığını bildirib. Qaliblərə tacın qoyulması mərasimini Ruhi həyata keçirib.

“Best model of Azerbaijan-2010” yarışmasının münsiflər heyəti əməkdar incəsənət xadimi, modelyer Fəxriyyə Xələfova, Ruhi, “Best model of the world” yarışmasının prezidenti Ərkan Özərman, “Fashion Model Shcool” model məktəbinin prezidenti Lyubov Kutorova, “Ok Azərbaycan” jurnalının baş redaktoru Könül Nağıyeva, Azərbaycan Fotoqraflar Birliyinin rəhbəri Asiyat Fətullayeva, Azərbaycanın xalq artisti Aygün Kazımova, müğəni Elnur Hüseynov, “Best model of the world” yarışmasının koordinatoru, dizayner Ramazzo, eləcə də prezidentlər Validə Abbasova və Anar Ağakişiyevdən ibarət olub. Lakin qeyd olunduğu kimi, Erkan Özərman və Aygün Kazımova mərasimdə sona kimi qalmayıblar. Bundan başqa, öncədən münsiflər heyətində olacağı güman edilən türkiyəli müğənni Ebru Polad, Röya, Zəhra Bədəlbəyli gecəyə qatılmayıblar. Gecədə Fəxriyyə Xələfova və dizayner Ramazzonin geyimlərinin nümayişi də təşkil edilib.

Onu da əlavə edək ki, nəticə ilə bağlı yarışmanın prezidentlərindən olan stilist Anar Ağakişiyev bazar ertəsi mətbuat konfransı keçirəcək.