Şou-biznes

Ana səhifə

Şou-biznes

Fəxriyyə Xələfova: “Best model of Azerbaijan” müsabiqəsində əsas problem münsiflər heyətinin tam siyahısının sona kimi müəyyənləşməməsi ilə bağlı olub”

23 oktyabr 2010 13:29 (UTC +04:00)

Bakı. Ülkər Qasımova – APA. “Mən hər il “Best model of Azerbaijan” müsabiqəsinin düzələcəyinə ümid edirəm və bunu gözləyirəm. Amma görürəm ki, düzəlmir. Sadəcə Erkan Özərman belə bir təşəbbüslə çıxış etdi ki, bu dəfə yubiley tədbirdir və bu, Nahid Kabakçının xatirəsinə ithaf olunur. Bundan sonra mən üzümü çevirib gedə bilməzdim. Yenə də iştirak etdim və eyni çətinliklərin yarandığını bir daha gördüm”. Bunu APA-ya açıqlamasında əməkdar incəsənət xadimi, “Best model of Azerbaijan-2010” müsabiqəsinin münsiflər heyətinin üzvü modelyer Fəxriyyə Xələfova deyib.

Modelyer müsabiqənin sonunda səslərin hesablanması məqamını təşkilatçıların nəzərdən qaçırdıqlarını deyib: “Səs toplanmasında əsas problem ondan ibarət olub ki, münsiflər heyətinin tam siyahısı sona kimi bəlli olmayıb. Bu səbəbdən nəticə hətta bu gün sual doğurur. Bu sualların aradan qalxması üçün münsiflər heyətinin əsas siyahısını çıxarmaq, səsləri yenidən hesablamaq, ya əlavə etmək, ya da real nəticə çıxarmaq lazımdır. Əsas problem odur ki, yarış günü Türkiyə nümayəndə heyətindən öncədən məlum olmayan, adlarını bilmədiyim, hətta sayı belə bilinməyən çoxsaylı insanlar münsiflər heyətində əyləşdi və Türkiyədən gələn heyətin səsi toplanıb münsiflərin ümumi səsinə qatıldı. Mənə bildirdilər ki, onların səsi yığılan səslərə əlavə olunmalıdır və onların hamısı səslərini Günaya veriblər».

F.Xələfova qeyd edib ki, ötən gün baş tutan final şousunda nəticəni müəyyən etmək çox çətin olub: «Çünki gözlənilmədən jüri üzvlərinin sayı artıb. Kimin kimə səs verdiyini saymaq mümkün deyildi və konkret nəticəni söyləməyi mən üzərimə götürə bilmərəm. Validə Abbasova məndən, Lyubov xanımdan və Ramozzidən xahiş etdi ki, oturub heç olmasa nəticələri çıxarıb finalı başa vuraq. 8 qız və 8 oğlan üçün nominasiya olub, bu nominasiyalar da səslənməli idi. Əslində isə bütün bu işlər xüsusi hesablama komissiyası tərəfindən aparılmalı idi. 15 dəqiqə içində, özü də qaranlıq bir yerdə bunu hesablamaq həddindən artıq çətindir».

F.Xələfovanın fikrincə, problemin həlli üçün müsabiqənin prezidentləri tərəfindən səslərin yenidən hesablanıb-hesablanmaması ilə bağlı qərar verilməlidir: «Təşkilatçılar son nəticənin hesablanmasını nəzərdən qaçırıblar. Kor-koranə hesablama düzgün deyil. Bir vərəqin itməsi artıq nəticəni dəyişə bilər. Ona görə də bunu çox diqqətli şəkildə həyata keçirmək lazım idi».