Şou-biznes

Ana səhifə

Şou-biznes

“Eurovision-2011” müsabiqəsi ilə bağlı Azərbaycanda keçirilən milli seçimlərin canlı yayımında 77 iştirakçı bacarığını göstərəcək – EKSKLÜZİV

03 noyabr 2010 14:56 (UTC +04:00)

Bakı. Ülkər Qasımova – APA. Gələn ilin mayında Almaniyanın Düsseldorf şəhərində keçiriləcək “Eurovision -2011” yarışmasında Azərbaycan təmsilçisinin seçilməsi üçün keçirilən milli seçimlərin canlı yayımına noyabrın 15-də başlanacaq. Bunu APA-ya açıqlamasında İctimai Televiziya və Radio Yayımları Şirkətinin (İTV) ictimaiyyətlə əlaqələr şöbəsinin müdiri Tahir Məmmədov deyib. O bildirib ki, seçimlərin növbəti turuna 77 iştirakçı vəsiqə qazanıb. Bu gün isə növbəti tura vəsiqə qazanan 77 nəfərlə İTV-də görüş və püşkatma keçirilib. 77 nəfər 7 həftə davam edəcək, həftənin beş günü yayımlanacaq canlı efirdə öz istedad və bacarıqlarını nümayiş etdirəcəklər.
7 həftənin hər birində isə 11 iştirakçı mübarizə aparacaq. Hər həftənin beşinci günü münsiflər və tamaşaçılar tərəfindən ən çox səs toplayan iştirakçı həftənin qalibi olacaq və həmin şəxs növbəti tura keçəcək. Keçiriləcək 7 həftəlik canlı efirdə Azərbaycanı “Eurovision-2011” müsabiqəsində təmsil etmək arzusunda olan 7 namizəd növbəti turda mübarizə aparmaq imkanı qazanacaq.

Bu gün keçirilən görüşdə namizədlərlə söhbətlər aparılıb və püşkatma mərasimi baş tutub. Püşkatmada 77 iştirakçının hansı həftədə çıxış edəcəyi müəyyənləşib. Milli seçimlərin iştirakçıları ilə görüşü “Eurovision” müsabiqəsi üzrə Azərbaycanın musiqi koordinatoru Zəhra Bədəlbəyli, eləcə də İTV-nin əməkdaşları və “Eurovision” üzrə Azərbaycan nümayəndə heyətinin üzvləri Hüsniyyə Məhərrəmova, Leyla Quliyeva və Könül Arifqızı keçiriblər.

“Eurovision-2011” müsabiqəsində Azərbaycan təmsilçisinin seçilməsi üçün keçirilən seçimlərdə növbəti tura vəsiqə qazananlar arasında Səbinə Babayeva, İlhamə Qasımova (“Yeni ulduz”), Çingiz Mustafayev (“Yeni ulduz”), Xəyyam Nisanov, Nurlan Növrəsli (“Azəri star”), Şölə Səfərəliyeva (“Bəri bax” qrupu), Aygün (“Yeni ulduz”), “Next qrupu”, Seyran İsmayılxanov, Diana Hacıyeva, Arzum, Emin Nəsirli (“Azəri star”), Azad Şabanov (“Yeni ulduz”), Adil (“Next” qrupunun keçmiş üzvü), Aynişan Quliyeva, Gülnar və Nəbi (“Star və sən” layihəsi ) Günay (“Yeni ulduz”), Xəyyam (“Akademiya” layihəsindən) Cəbrayıl Rəsulov kimi tamaşaçılara tanış olan simalar da var. Onu da öyrəndik ki, milli seçimlərdə növbəti tura yerli sənətçilər vəsiqə qazanıb. Bu 77 nəfər seçimlərdə iştirak etmək üçün müraciət edən 120-yə yaxın şəxs arasından seçilib.

Qeyd edək ki, noyabrın 15-də start götürəcək canlı yayımda hər iştirakçının öz SMS nömrəsi olacaq ki, həmin nömrəyə səs verməklə tamaşaçı istədiyi iştirakçını dəstəkləyə biləcək. Bununla yanaşı, hər gün canlı efirdə xüsusi münsiflər heyəti əyləşəcək. İştirakçıların seçilməsində 50% onların səsi rol oynayacaq. Münsiflər heyətində bəstəkar Faiq Sücəddinovun da təmsil olunacağı məlum olub. Azərbaycanı “Eurovision-2011” yarışmasında təmsil edəcək müğənninin və ya qrupun kimliyi isə növbəti turda, fevralın ilk günlərində açıqlanacağı nəzərdə tutulur.

Xatırladaq ki, “Eurovision-2011” müsabiqəsi gələn ilin mayında Almaniyanın Düsseldorf şəhərində baş tutacaq. Yarışmanın yarımfinal mərhələləri mayın 10-u və 12, finalı isə 14-də baş tutacaq.