Şou-biznes

Ana səhifə

Şou-biznes

“Eurovision-2011”də Azərbaycanı təmsil etmək üçün milli seçimlərə qatılan türkiyəli müğənni Tarik Yigit ilk həftə yarışacaq – FOTO

“Eurovision-2011”də Azərbaycanı təmsil etmək üçün milli seçimlərə qatılan türkiyəli müğənni Tarik Yigit ilk həftə yarışacaq – <font color=red>FOTO </font>

12 noyabr 2010 12:34 (UTC +04:00)

Bakı. Ülkər Qasımova-APA. Gələn ilin mayında Almaniyanın Düsseldorf şəhərində keçiriləcək “Eurovision-2011” yarışmasında Azərbaycanı təmsil edəcək şəxsin seçilməsi üçün keçirilən seçimlərin ilk həftəsində 11 iştirakçı mübarizə aparacaq. İctimai Televiziya və Radio Verilişləri Şirkətinin (İTV) ictimaiyyətlə əlaqələr şöbəsinin müdiri Tahir Məmmədovun APA-ya verdiyi məlumata görə, noyabrın 15-də start götürəcək milli seçimlərin ilk həftəsində 10 Azərbaycan, 1 türk müğənnisi mübarizə aparacaq. Azərbaycanı “Eurovision-2011”də təmsil etmək arzusunu gerçəkləşdirmək məqsədi ilə keçirilən milli seçimlərdə iştirak etmək üçün gələn türk müğənni Tarık Yigitdir. Seçimlərin ilk canlı efir həftəsində Nuranə Ələsgərova, Tarik Yigit, Gülçöhrə Babayeva, Ülviyyə Abbasova, Çingiz Mustafayev, Tofiq Hacıyev, “Next” qrupu, Aygün İsmayılova, Adil Baxışlı, Zülfünaz Rəcəbova və Xana Həsənova öz istedadlarını nümayiş etdirəcəklər.

T. Məmmədov bildirib ki, “Eurovision” mövzusu ölkəmizdə tamaşaçı auditoriyasının daim maraq dairəsində olduğundan, bütün yerli KİV bu layihə ilə bağlı məlumatlar verir və bəzən bu informasiyalar yanlış olur: “Bu da həm tamaşaçılar da, həm də “Eurovision”la birbaşa bağlı olan adamlarda çaşqınlıq yaradır. Hazırda start götürən Milli Seçim turu ilə bağlı bütün dolğun və dəqiq informasiyaları bizdən əldə etmək lazımdır”.

Şöbə müdiri deyib ki, iştirakçılar noyabrın 15-dən etibarən hər gün İctimai Televiziyanın efirində saat 21.00-dan 23.00-dək canlı yayımlanan xüsusi proqramda yarışacaqlar. 7 həftə davam edəcək proqramda hər həftə 11 nəfər mübarizə aparacaq. İştirakçıların SMS nömrələri isə 5 gün ərzində daim aktiv olacaq. Cümə günü həftənin qalibi həftə boyu SMS səsvermənin nəticələrinə və jürinin rəyinə əsasən müəyyən olunacaq. T. Məmmədov onu da deyib ki, 77 nəfər namizəd arasından 7-si yarımfinala vəsiqə qazanacaq və namizədlər 50% münsiflər heyətinin, 50% isə tamaşaçı səsverməsi ilə seçiləcək. Münsiflər heyətinin tərkibi isə canlı efirin ilk günü, yəni noyabrın 15-də ictimaiyyətə məlum olacaq.

Onu da bildirək ki, bu il milli seçimlərdə Azərbaycanın rəsmi fan-klubu olan “Ogae Azerbaijan” iştirak edəcək. “Ogae-Azerbaijan”ın vitse-prezidenti Ömər Əbdülkərimovun verdiyi məlumata görə, milli seçimlərin iştirakçılarına mahnı seçimində kömək edəcək, “Eurovision” müsabiqəsinin hitlərindən mahnıların instrumental versiyasını əldə etməyə yardım göstərəcəklər.