Şou-biznes

Ana səhifə

Şou-biznes

Vaxtanq Kikabidze: “Yalnız Tiflisdə və Bakıda məmnuniyyətlə yaşayaram” – FOTOSESSİYA

Vaxtanq Kikabidze: “Yalnız Tiflisdə və Bakıda məmnuniyyətlə yaşayaram” – <font color=red>FOTOSESSİYA </font>

22 noyabr 2010 08:26 (UTC +04:00)

Bakı. Ülkər Qasımova-APA. Noyabrın 21-də Gürcüstanın tanınmış müğənnisi Vaxtanq Kikabidze Heydər Əliyev Sarayının səhnəsində konsert proqramı ilə çıxış edib. APA-nın məlumatına görə, “Ya jizn ne toroplyu” adı altında gerçəkləşən konsertdə Vaxtanq Kikabidze möhtəşəm çıxışlar edib. Üç saata yaxın davam edən proqramda müğənni nə zarafatından, nə də rəqsindən qalıb. Maraqlıdır ki, səhnə arxasında köməksiz gəzə bilməyən sənətçi, səhnədə tamaşaçılara bu narahatlığını qətiyyən büruzə verməyib. O sərbəst şəkildə hər mahnısı altında rəqs edib, mükəmməl sənətkarlıq nümayiş etdirib. Konsertdə Vaxtanq Kikabidze mahnıları əsasən rus dilində ifa edib. Sənətçi tez-tez tamaşaçılarla söhbət etməyi də unutmayıb və onu bu gecə tək qoymadıqları üçün bütün pərəstişkarlarına təşəkkürünü bildirib: “Mən yenidən burada sizlərin qarşınızda konsert verməkdən çox məmnunam. Bu konsertim ölkə başçısı Mixail Saakaşvilinin göstərişi ilə keçirilən dünya turnem əsasında təşkil olunub. Mixail Saakaşvili bildirdi ki, dünyanın bütün ölkələrində - harada diasporumuz var, orada konsertlərim keçirilsin və həmyerlilərimlə görüşüm baş tutsun. Bu turne çərçivəsində ilk konsertim Marnuelidə olub, ikinci konsertim isə hazırda Bakıda keçirilir. Hələ bundan sonra çox konsertlərim olacaq. Mən Bakını çox sevirəm və hər zaman da bütün çıxışlarım da demişəm ki, iki şəhərdə məmnuniyyətlə yaşayaram. Bunlardan biri əlbəttə ki, Tiflis, ikincisi isə Bakıdır. Hər iki şəhəri çox sevirəm və burada özümü çox rahat hiss edirəm”.

Vaxtanq Kikabidze konsert boyunca bir neçə dəfə “Yaşa Azərbaycan” deyərək, Azərbaycan xalqına sülh və əmin-amanlıq, yaxşı yaşayış arzulayıb. Gürcü müğənnisi Azərbaycanda çoxsaylı dostları olduğunu da bildirib və yaşlandığını dilinə gətirib: “Tamaşaçılar arasında gənclər görürəm, sözsüz mənim vaxtlarımın gənclərini. Elə bu mahnılarımı onlar daha yaxşı xatırlayır. İndi isə onların əl-ayağı əsir, amma bura gəliblər. Axı biz hamımız eyni dövrün insanlarıyıq. Mən bu gün bu səhnədə sizinlə sağollaşacağam, amma bu həyatdan sağollaşmağım anlamına gəlmir. Buna Allah qərar verəcək, nə vaxt lazım olsa, onda da gedəcəyəm...” Hər çıxışı tamaşaçılar tərəfindən alqışlarla qarşılanan müğənniyə gül dəstələri və hədiyyələr də təqdim olunub.

Proqram çərçivəsində saray səhnəsində qurşadılan böyük ekranda Vaxtanq Kikabidzenin rol adlığı filmlərdən fraqmentlər də nümayiş etdirilib. Sonda Vaxtan q Kikabidze ayaqüstü alqışlarla yola salınıb. Konsertdən sonra isə Gürcüstandan xüsusi olaraq gətirilmiş gürcü çaxırı, üzərində Vaxtanq Kikabidzenin fotosu olan köynəklər, eyni zamanda müğənninin dvd və cd-si satışa çıxarılıb.

Qeyd edək ki, Heydər Əliyev Sarayının təşkilatçılığı ilə keçirilən konsertin informasiya dəstəyi APA İnformasiya Agentliyinə məxsusdur.