Şou-biznes

Ana səhifə

Şou-biznes

Nurlan Növrəsli: “Dörd qardaş var gücümüzü toplayıb, Azərbaycanımızın, Qarabağımızın, Şuşamızın səsini “Eurovision”da ucaldacağıq” - MÜSAHİBƏ – FOTOSESSİYA

Nurlan Növrəsli: “Dörd qardaş var gücümüzü toplayıb, Azərbaycanımızın, Qarabağımızın, Şuşamızın səsini “Eurovision”da ucaldacağıq” - <font color=red>MÜSAHİBƏ – FOTOSESSİYA </font>

03 dekabr 2010 13:20 (UTC +04:00)

- “Eurovision" müsabiqəsində iştirak etmək qərarını özün verdin, yoxsa ətrafdakıların məsləhəti ilə bu addımı atmısan?

- Bu fikir ailəmdən, qardaşlarımdan və işlədiyim insanlardan gəldi. Mənə “Nurlan sən bizi Eurovisionda təmsil etməlisən!” dedilər. Bu dəstəkdən, onların mənə inanmalarından böyük ilham aldım, özümə inamım daha da artdı. Seçim turlarına ciddi hazırlıq, daimi məşqlər, tamaşaçıların mənə olan dəstəyi və dəyərli münsiflər heyətinin verdikləri yüksək bal nəticəsini göstərdi.

- Azərbaycanda keçirilən milli seçimlərdə iştirak edən ifaçılar arasında tanınan simalardan biri də sənsən. Narahat deyilsən ki, seçimlərdə uğur qazana bilmərsən və bu hal pərəstişkarlarının sayının azalmasına səbəb olar?

- Qətiyyən narahat deyiləm. Sənətdə olduğum illər ərzində bir neçə dəfə beynəlxalq müsabiqələrdə iştirak etmişəm, həmin müsabiqələrdən Vətənimə qalibiyyətlə qayıtmışam. 2006-cı ildə Qazaxıstanda keçirilən “Cahan Dala” IX Beynəlxalq mahnı və musiqi müsabiqəsində I yerə, 2009-cu ildə Novorosiyskdə keçirilən Gənc İfaçıların VIII Beynəlxalq “Morskoy Uzel” müsabiqə-festivalında II yerə layiq görülməyim bunun bariz nümunəsidir. Qarşıma qoyduğum məqsədə hər zaman çatıram. Uğur, qələbə qazanmaq üçün çox çalışırıq. Mənim böyük komandam var - başda ailəm, qardaşlarım Şahin, Tərlan, Arslan olmaqla, köməkçim Elsəvər, prodüserim Zema, dostlarımın, yaxınlarım hazırlıq prosesində də köməklərini əsirgəmirlər.

- Niyə tamaşaçılar və münsiflər “Eurovosiion-2011” yarışmasında Azərbaycanı təmsil etmək üçün Nurlan Növrəslini seçməlidirlər? Digər namizədlərdən hansı üstünlüklərin var?

- Çünki biz dörd qardaşıq... Bu suala təffərrüatı ilə isə fevral ayında Milli Seçim Turlarının Final mərhələsində cavab tapacaqsınız.

- Səhnədə ifa zamanı rəqs etmirsən. Azərbaycan təmsilçisi seçilsən, bu stereotipi “Eurovision” səhnəsində qıracaqsan, yoxsa orada da səhnə imicini saxlamağa üstünlük verəcəksən?

- Hər şey mahnıdan asılıdır, mahnı tələb etsə, əlbəttə ki, rəqs də olacaq.

- Məlumatımız var ki, müsabiqədə Növrəslilər ailəsi olaraq təmsil olunmaq istəyindəsiniz. Bu, necə olacaq? Dörd qardaşın hamısı səhnəyə çıxmaq istəyindədir?

- Düzdür, biz Növrəsliləri xaricdə də kifayət qədər tanıyırlar. Bu illər ərzində biz qardaşlar 6-7 Avropa şəhərində solo konsertlərlə çıxış etmişik. Şahin Növrəsli - mənim böyük qardaşım xaricdə kifayət qədər tanınan musiqiçi, caz pianoçusudur. Tərlan Növrəsli - fəlsəfə doktorudur, Türkiyədə təhsil alıb, şairliyə böyük marağı və istedadı var. Bu il “Sərab” adlı kitabı da işıq üzü gördü. Hətta Tərlan ilk “Türkstar” müsabiqəsinin finalçısı olub. Həmçinin onu da qeyd edim ki, Tərlan mənim müsabiqədə bir çox çıxış nömrələrimin ssenari müəllifidir. Arslan Növrəsli Bakı Musiqi Akademiyasının magistratura pilləsində təhsil alır və hazırda tar sinfi üzrə müəllim kimi fəaliyyət göstərir. Müsabiqəni izlədiyim bir neçə il ərzində səhnədə dörd qardaşın çıxışı olmayıb. Hər dördümüzün hələ uşaqlıqdan xəmiri musiqi ilə yoğrulub, valideynlərimizin də musiqiyə bağlılıqları var. Atam Növrəs müəllim gözəl tar ifa edir, anam Nailə xanımın isə çox gözəl səsi var. Yəqin elə biz qardaşlara da bu istedad onlardan keçib. Əsas amil isə əlbəttə ki, bizim qarabağlı, şuşalı olmağımızdır. Çünki bu müqəddəs torpaq artıq öz suyu ilə insana istedad bəxş edir, buna görə Azərbaycanıma, Qarabağıma, Şuşama hər zaman minnətdaram. Biz - dörd qardaş var gücümüzü toplayıb, Azərbaycanımızın, Qarabağımızın, Şuşamızın səsini ucaldacağıq!

- Final mərhələsinin hazırlıqlarına başlamısanmı?

- Artıq hazırlıqlara başlamışıq. Şahin Növrəsli final mərhələsinə artıq mahnı da yazır. Komanda tərəfindən ssenari hazırlanır, rəqs dərslərində iştirak edirəm. Hazırlıqların nəticəsini final mərhələsində izləyə biləcəksiniz.

“Eurovision”