Şou-biznes

Ana səhifə

Şou-biznes

“Euroviison-2011” müsbaqəsi üzrə milli seçimlərin finalına vəsiqə qazanan üçüncü namizəd Günay İbrahimli: “Nurlan Növrəsli və Çingiz Mustafayevdən səs baxımından daha güclüyəm” – MÜSAHİBƏ - FOTOSESSİYA

10 dekabr 2010 12:17 (UTC +04:00)

Bakı. Ülkər Qasımova-APA. Almaniyanın Düsseldorf şəhərində gələn ilin mayında keçiriləcək “Eurovision-2011” müsabiqəsində Azərbaycan təmsilçisinin müəyyənləşməsi üçün keçirilən milli seçimlərin üçüncü həftəsinin qalibi Günay İbrahimli APA-ya müsahibə verib.

- Milli seçimlərin finalına hazırlıq prosesi necə gedir?
- Final şousuna çox az qalıb, ancaq var-gücümlə həmin çıxışa hazırlaşıram. Umid edirəm ki, yaxşı çıxış alınacaq. Tamaşaçıların və münsiflərin inamını doğrultamağa və təmsilçi adını qazanmağa çalışıram.

- Niyə məhz sən “Eurovision-2011” müsabiqəsində Azərbaycan təmsilçisi olmalısan? Digər namizədlərdən üstünlüklərin nədədir?
- Hələlik finalda çıxış edəcək üç finalçının kimliyi məlumdur. Həmin o iki ifaçıdan səs baxımından daha güclüyəm. Digər namizədlərin kimliyi hələ məlum deyil deyə, onlar haqqında bir söz deyə biılməyəcəyəm. Çalışıram ki, finalda rəqiblərimdən fərqli tərzdə çıxış edim və yadda qalım.

- Ötən həftə sən finala münsif və tamaşaçı səsverməsi əsasında vəsiqə qazandın. Ancaq həftənin ikincisi olan şotlandiyalı müğənni Nikola Barklayin də finala keçməsi üçün münsiflərə müraciət olundu və bu müraciət müsbət nəticələndi. Bu durum səni qıcıqlandırmadı?
- Bu hal məni qıcıqlandırmadı. Düşünürəm ki, Azərbaycanın milli seçimlərinə qatılması onun üçün çox çətindir. Mən özüm də başqa ölkədə keçirilən seçimlərə qatılsaydım, bu mənim üçün çox çətin olardı. Azərbaycan dilini qətiyyən bilmir, amma bura gəlib ölkəmizi o müsabiqədə təmsil etmək istəyi çox böyük bir şeydir.

- Nurlan və Çingizdən səs baxımından güclü olduğunu deyirsən. Etiraf edək ki, hər iki finalçı tamaşaçılar tərəfindən səndən daha çox tanınırlar...
- Mən Çingiz Mustafayevlə eyni müsabiqədə iştirak etmişəm. Düzdür, həmin müsabiqədə Çingiz qalib oldu. Bu dörd il ərzində mən efirlərə çıxmırdım, üzərimdə işləyirdim ki, irəliləyim və inkişaf edim. İndi də bu illər ərzində çəkdiyim əziyyətlər göz önündədir. Bu seçimlərdə iştirak zamanı həyəcan var idi. Narahat idim ki, səsim əsər, nə isə xoşagəlməz durumlar yaşanar. Doğrudur, bəzi mahnılarda xaric notlarım da oldu, ancaq mən finala çıxmağa layiqli idim və elə də oldu.

- Günay, bu cür fikirlər də səslənir ki, gələn il Azərbaycan bu mötəbər müsabiqədə oğlan ifaçı ilə təmsil olunacaq. Bu cür düşüncələr səni narahat etmir ki?
- Bu cür söhbətlərin olduğundan xəbərsizəm. Sözün düzü, ötən il də seçimlər ərəfəsində çox söz-söhbətlər var idi. Hər il bütün təmsilçi ölkələrdə bu cür hallar olur. Mən isə ümumiyyətlə, nə danışıldığına əhəmiyyət vermirəm. Əvvəlcədən nəticənin nə olacağı barədə heç nə bilmək olmaz. Nəticə çıxışlardan və göstəriləcək perfomanslardan asılıdır. Rəqabət çox güclü olmalıdır və 7 finalçının hər biri yüksək səviyyədə çıxış etməlidir. Hər birimiz Azərbaycanın adına görə çalışırıq. Finalda sürprizlərim çox olacaq və tamaşaçılara bu ada layiqli olduğumu göstərəcəyəm.

- Əgər təmsilçilik şansı sənə nəsib olmasa, növbəti illərdə də mübarizəyə qatılacaqsan, yoxsa bu iddiadan imtina edəcəksən?
- Yox qətiyyən iddiamdan vaz keçmək fikrim yoxdur. Seçilməsəm, daha çox hazırlaşacağam, yatmayacağam, istirahət etməyəcəyəm, həvəsdən də qətiyyən düşməyəcəyəm, öz üzərimdə daima çalışacağam. İnşallah hər şey yaxşı olacaq.

- Səncə, bu həftənin qalibi kim olacaq?
- Bir tamaşaçı kimi fikrimi bildirim. Məncə, bu həftənin qalibi Arzum olacaq.