Şou-biznes

Ana səhifə

Şou-biznes

“Eurovision-2011” müsabiqəsində Azərbaycan təmsilçisinin müəyyənləşməsi üçün keçirilən seçimlərin dördüncü həftəsinin qalibi Arzum Xəlilovadır - FOTO

10 dekabr 2010 20:42 (UTC +04:00)

Bakı. Ülkər Qasımova – APA. Gələn ilin mayında Almaniyanın Düsseldorf şəhərində baş tutacaq “Eurovision-2011” yarışmasında Azərbaycanı təmsil edəcək şəxsin müəyyənləşməsi üçün keçirilən seçimlərin yarımfinal mərhələsinin dördüncü həftəsinin qalibi Arzum Xəlilova olub. APA-nın məlumatına görə, dördüncü həftənin qalibi də ənənəvi olaraq 50% münsiflər heyətinin, 50% isə tamaşaçı səsverməsinə görə seçilib. Milli seçimlərin dördüncü yarımfinal həftəsində 2-ci yerdə Aydan Rüstəmova, 3-cü yerdə Səbinə Babayeva, 4-cü yerdə Cavanşir Hacıyev, 5-ci yerdə Rəhimə Həsənəlizadə, 6-cı yerdə Çinarə Nəzərli, 7-ci yerdə Ramin Quliyev, 8-ci yerdə Emilya Yaqubova, 9-cu yerdə Milan Məmmədov, 10-cu yerdə Səid İsmayılzadə, 11-ci yerdə isə Leyla Dadaşova qərarlaşıb. Dördüncü həftənin aparıcılığını həyat keçirən Leyla Quliyeva deyib ki, münsiflər heyəti bu həftənin iştirakçılarının hazırlığından o qədər də razı qalmayıblar.

Həftənin son günü qonaq qismində “Eurovision-2010” müsabiqəsində Azərbaycanı təmsil etmək üçün milli seçimlərdə iştirak edən Ülviyyə Rəhimova və “Milk&Kisses” qrupu iştirak edib. Ülviyyə Rəhimova bu həftə 11 ifaçı arasında öz səsini Səbinə Babayevaya, “Milk&Kisses” qrupu isə Səbinə Babayeva və Emilya Yaqubovaya verdiklərini bildiriblər. Eyni zamanda gecənin qonağı olan əməkdar incəsənət xadimi, modelyer Fəxriyyə Xələfova da dəstəklədiyi namizədin adını açıqlayıb. Məlum olub ki, modelyer Fəxriyyə Xələfova bu həftənin iştirakçıları arasında Səbinə Babayeva və Milan Məmmədovun ifasını daha çox bəyənir. Elə həftənin son günü canlı yayımda iştirak edən tamaşaçıların əksəriyyətinin də Səbinə Babayevanı dəstəkləməsi və bu sənətçinin fotosunu əllərində tutması açıq-aydın görünüb.

Arzum Xəlilova tamaşaçı və münsiflər heyətindən ən çox səs toplayaraq Azərbaycanı mötəbər “Eurovision” yarışmasında təmsil etməyə bir addım da yaxınlaşıb.

Qeyd edək ki, yarımfinal mərhələsi bundan sonra 3 həftə də davam edəcək. Hər həftə 11 namizəd öz istedadlarını nümayiş etdirəcək və səsvermə yolu ilə 1-i finala keçəcək. Azərbaycanın “Eurovision-2011” müsabiqəsindəki təmsilçisi finala vəsiqə qazanan ifaçılar arasından seçiləcək. Çingiz Mustafayev, Nurlan Növrəsli, Günay İbrahimli və Arzum Xəlilova, eyni zamanda münsiflər heyətinin rəyi ilə Nikola Barklay artıq finala vəsiqə qazanan ifaçılardandır.