Şou-biznes

Ana səhifə

Şou-biznes

“Eurovision-2011” müsabiqəsində əsas favoritlərdən biri olan Fransa təmsilçisi Amaury Vassili: “Öz səsimə, öz gücümə, öz musiqimə inanıram” – MÜSAHİBƏ - FOTOSESSİYA

“Eurovision-2011” müsabiqəsində əsas favoritlərdən biri olan Fransa təmsilçisi Amaury Vassili: “Öz səsimə, öz gücümə, öz musiqimə inanıram” – <font color=red>MÜSAHİBƏ - FOTOSESSİYA </font>

11 may 2011 07:25 (UTC +04:00)

Fransa təmsilçisi gərgin hazırlıq rejiminə baxmayaraq bizimlə söhbətə razılıq verib. Qeyd edək ki, Vasili bir çox media mənsublarına müsahibə verməkdən imtina edib.

- Avropanın ən çox izlənilən mahnı müsabiqəsinə hazırlıqlar necə gedir?

- Hazırlıqlarım çox yaxşı gedir, səs məşqlərimlə məşğulam. Son çıxışıma qədər də səsim üzərində işlər davam edəcək, çünki “Eurovision” səhnəsində çıxış etmək istedadını tanıtmaq üçün inanılmaz bir şansdır. Bu günə kimi məşqləri izləyirdim, sonunda bu gün özüm də səhnəyə çıxdım. Təəssüratlarım inanılmaz gözəldir. Əslində bu səhnədə çıxış etmək çox böyük şansdır və bu şansın mənə nəsib olması çox sevindiricidir. Ekrandan baxmaq bir başqa, həmin səhnədə çıxış etmək isə tamamilə başqa hissdir. Ümid edirəm ki, mayın 14-də səhnədə mənə olan ümidləri boşa çıxarmayacağam.

- Builki müsabiqədə siz əsas favoritlərdən biri hesab edilirsiniz...

- Əslində bu cür böyük yarışmada güclü təmsilçilər arasından seçilib favorit kimi görünmək mənə qürur verir. Ancaq favorit hesab olunmaq hələ hər şey demək deyil. Mayın 14-də çıxış edəcək favoritlərin hansının özünü doğruldacağı daha önəmlidir.

- Necə düşünürsünüz, Lenadan qələbə estafetini alan siz olacaqsınız?

- Dəqiq heç bir şey deyə bilmərəm. Sadəcə bir şey bilirəm - öz səsimə, öz gücümə, öz musiqimə inanıram. Mahnım çox gözəldir, ancaq bu mahnının Avropa tərəfindən necə qiymətləndiriləcəyini deyə bilmərəm. Hamı kimi mən də buraya qələbə üçün gəlmişəm.

- Sizcə bu yarışmada ən güclü rəqibiniz kimdir?

- Demək olar ki, bütün mahnılara qulaq asmışam və hər bir mahnının özünə görə bir şansı var. Müxtəlif tipdə mahnılar və ifalar var, yarışmanın səsləri bir neçə ölkə arasında bölünə bilər. Mənim sevdiyim ifa tərzi opera - vokal olduğuna görə, seçim edə bilmirəm. Bu il müsabiqədə opera janrında ancaq mən ifa edirəm. Kimin qalib gələcəyini əvvəldən bəyan etmək qeyri-mümkündür. Vokal janrı olduğu üçün tam favoritim yoxdur.

- Azərbaycan təmsilçilərinin mahnısını eşitmisinizmi və onların ifasını necə dəyərləndirirsiniz?

- Azərbaycan mahnısını dinləmişəm və düşünürəm ki, iki qarşı cinsin səhnədə məhəbbətdən ballada oxuması hamıya gözəl təsir edəcək. Azərbaycan təmsilçilərinin finalda şansları çox yüksəkdir.

- Bəs “Blue” kimi dünya şöhrətli bir qrupla qalibiyyət uğrunda mübarizə aparmaq sizə çətin gəlmir ki?

- “Blue” qrupu uşaqlıq yaşımdan mənə doğma bir qrupdur. Heç zaman ağlıma gətirməzdim ki, bu qrupla eyni səhnədə çıxış edəcəyəm, hətta onlarla eyni müsabiqədə qalibiyyət uğrunda mübarizə aparacağam. Elə bütün bunlara görə, özümü çox şanslı hesab edirəm. Əgər qalibiyyət qazansam, öz gücümə daha da əmin olacağam. 21 yaşında dünya şöhrətli sənətçilərə qalib gəlmək böyük uğur olar.