Şou-biznes

Şou-biznes

Eldar Qasımov və Nigar Camal “Eurovision-2011”in finalında uğurla çıxış ediblər

14 may 2011 22:35 (UTC +04:00)

Düsseldorf. Ülkər Qasımova – APA. Azərbaycanın “Eurovision-2011” müsbaiqəsindəki təmsilçiləri Eldar Qasımov və Nigar Camal hazırda “Esprit Arena”da keçirilən final mərhələsində uğurlu çıxış ediblər. APA-nın Düsseldorfa ezam olunmuş xüsusi müxbirinin məlumatına görə, 25 ölkənin iştirak etdiyi musiqi yarışmasında Azərbaycan təmsilçiləri 19-cu səhnəyə çıxıblar. E. Qasımov və N. Camal bütün Avropanın favoritinə çevrilib. “Esprit Arena”da çoxsaylı soydaşlarımız, eləcə də türk qardaşlarımız Azərbaycan bayrağını dalğandırırlar. Təmsilçilərimiz çıxışı sürəkli alqışlar və “bravo” sədaları ilə müşayiət olunub. Eldar Qasımov və Nigar Camal isveçli müəlliflərə məxsus olan “Running Scared” mahnısı ilə Azərbaycan adından çıxış ediblər. Final konsertini 24 min tamaşaçı canlı, 125 milyon tamaşaçı isə televiziya ekranından izləyir.
Hər il olduğu kimi bu ildə hər təmsilçiyə öz şousunu nümayiş etdirmək üçün 3 dəqiqə zaman ayrılıb. Almaniyanın ev sahibliyi etdiyi bu yarışmanın final konserti mükəmməl şəkildə hazırlanıb.
Onu da bildirək ki, bir neçə ildir artıq “Eurovision” yarışmasının qalibi 50% münsiflər, 50% isə tamaşaçı səsverməsi nəticəsində seçilir. Artıq peşəkar münsiflər heyəti “Eurovision-2011” müsabiqəsinin finalında çıxış edəcək ölkələrə öz səslərini veriblər. Hazırda isə iştirakçı 43 ölkədən tamaşaçı səsverməsi həyata keçirilir. Münsiflər 25 ölkə təmsilçisini mayın 13-də “Esprit Arena”da keçirilən ikinci əsas məşqə əsasən qiymətləndiriblər. Əldə etdiyimiz məlumata görə, münsiflər Azərbaycan təmsilçilərinə yüksək səs veriblər. Əlavə edək ki, Azərbaycanın Avropa ölkələrindəki diaspora qurumları və dostluq cəmiyyətləri təmsilçilərimizə səs vermək üçün bütün güclərini səfərbər ediblər. Brüsseldə Azərbaycan-Belçika Dostluq Cəmiyyəti şəhərin mərkəzi küçələrinə Eldar və Nigarın plakatlarını asıb və dünya azərbaycanlılarına müraciət ediblər.

Avropa musiqi aləminin ən nüfuzlu mahnı yarışması olan “Eurovision”un möhtəşəm final şousu 50-dən artıq ölkədə yayımlanır.