Şou-biznes

Ana səhifə

Şou-biznes

EBU Azərbaycandan “Eurovision-2012” müsabiqəsi müddətində ölkəyə gələcək insanların və iştirakçıların təhlükəsizliyinin qorunmasına zəmanət verməsini istəyir

30 iyun 2011 00:41 (UTC +04:00)

Bakı. Ülkər Qasımova – APA. Avropa Yayım Birliyi (EBU) və İctimai Televiziya arasında Azərbaycanın ev sahibliyi edəcəyi “Eurovision -2012” mahnı müsabiqəsi istiqamətində ilk addim atilıb. APA-nın müsabiqənin rəsmi internet saytına istinadən yaydığı xəbərə görə, Bakı şəhərində keçirilməsi nəzərdə tutulan 57-ci “Eurovision” yarışmasına həsr olunmuş ilk görüş keçirilib. Cenevrədə EBU-nun baş ofisində baş tutan görüşdə Azərbaycan nümayəndə heyəti EBU rəhbərliyi ilə müvafiq məsələlər ətrafında söhbət ediblər.

Görüş zamanı EBU ilk əvvəl “Eurovision” müsabiqəsinin Azərbaycan üzrə yayımçısı olan və Avropa Yayım Birliyinin üzvü İctimai Televiziyanı qaydalarla tanış edib. Azərbaycan tərəfi keçiriləcək yarışma ilə bağlı EBU-ya planlarını açıqlayıb. Bu sırada mehmanxanalar, nəqliyyat, aeroport və digər planlar haqda geniş məlumat verilib.

EBU-dan Azərbayan nümayəndə heyətinin nəzərinə çatdırılıb ki, EBU loqosunun qeyri-qanuni istifadəsinə qadağa qoyur və yalnız bu loqonun qurumun tərəfdaşları, o cümlədən İctimai Televiziya tərəfindən istifadəsinə icazə verir. Eyni zamanda Avropa İnsan Hüquqları Konvensiyasının 10-cu maddəsinə əsasən iştirakçılar və jurnalistlər üçün söz azadlığı təmin edilməlidir. Yerinə yetirilməli olan standart tələblərlə yanaşı, EBU Azərbaycan hakimiyyətindən müsabiqə müddətində ölkəyə gələcək insanların və iştirakçıların təhlükəsizliyinin qorunmasına zəmanət verməsini istəyir. O da bildirilib ki, akkreditə olunmuş və bilet almış iştirakçılar, jurnalistlər və fanatlara ölkəyə daxil olmağa viza məsələsi asanlıqla həll olunmalıdır.

“Eurovision TV”-nin icraçı direktoru Jon Ola Sand qeyd edib ki, Azərbaycanın yarışmanı bu dərəcədə ciddi qəbul etməsinə sevinirlər və tarixin ən yaxşı yarışmasını Bakıda keçirmək istəyindədirlər.

Bakıda keçiriləcək “Eurovision-2012” müsabiqəsinin hansı arenada keçirilməsi məsələsinə gəlincə bildirilib ki, yeni arenanın tikintisi ilə bağlı artıq Azərbaycanda bir neçə təklif qəbul olunub. Azərbaycan nümayəndə heyəti hazırda bu təkliflərin dəyərləndirildiyini qeyd edib. Amma arena ilə bağlı Azərbaycan tərəfindən son qərar EBU-ya avqustda keçirilməsi nəzərdə tutulan növbəti toplantıda veriləcək.

Görüş zamanı eləcə də Azərbaycanda bu müsbaiqənin keçirilmə vaxtı EBU tərəfindən təsdiqlənib. Bu tarixlər 22, 24 və 26 maydır. Mayın 22-si və 24-ü yarışmanın yarımfinal, 26-da isə final mərhələsinin keçirilməsi qərar alınıb.