Şou-biznes

Ana səhifə

Şou-biznes

Kənan Doğulu: “Əzizə Mustafazadənin vurğunuyam və bütün albomlarını alıram” - FOTOSESSİYA

Kənan Doğulu: “Əzizə Mustafazadənin vurğunuyam və bütün albomlarını alıram” - <font color=red>FOTOSESSİYA</font>

23 sentyabr 2011 13:26 (UTC +04:00)

Bakı. Ülkər Qasımova-APA. “Azərbaycan 6 il müddətində inanılmaz dərəcədə inkişaf edib və bu bizi çox qürurlandırır. Bir yerdə oturan insan deyiləm, daima gəzirəm və tam səmimiyyətlə deyə bilərəm ki, bu gün Bakı dünyanın ən öndə gedən şəhərləri ilə yarışa bilər. Belə davam etsə, Bakı 4 ildən sonra birinci olacaq”. APA-nın məlumatına görə, bu sözləri ötən gün Bakıya gələn Türkiyənin sevilən və tanınan müğənnisi Kənan Doğulu media nümayəndələri ilə görüşündə deyib. Müğənni mətbuat konfransına 45 dəqiqə geciksə də, sualları səmimi və səlis cavablandırıb. Kənan Doğulu bu gün açıq hava altında Yaşıl Teatrda verəcəyi konsertin yaddaqalan olacağını da əminliklə vurğulayıb: “Azərbaycanı çox sevirəm və 6 il bundan əvvəl qapalı salondan fərqli olaraq bu gün açıq hava altında qarşınızda olacağam. Çox maraqlı və yeni proqram hazırlanıb. Ümid edirəm ki, hər birinizin ürəyini fəth edə biləcəyəm. Artıq məlumat almışam ki, konsertə çox böyük maraq var. Azərbaycanda bu qədər sevildiyim üçün çox şadam və bu sevgini mənə bəxş etdiyiniz üçün hər birinizə təşəkkür edirəm”.
Azərbaycan mədəniyyətinin və musiqisini çox sevdiyini ifadə edən Kənan Doğulu, yerli musiqiçilərimizdən yalnız bir nəfərin adını çəkib: “Azərbaycandan olan məşhur caz ifaçısı Əzizə Mustafazadənin vurğunuyam. Onun bütün albomlarını alıb dinləyirəm və ayrı bir həzz alıram. Azərbaycan sözün həqiqi mənasında hər bir sahədə inkişaf edir. Ən çox dinlədiyim caz, sevdiyim isə rok musiqisidir və bunlara həvəsim çoxdur. Pop musiqinin də inkişafından xəbərdaram, amma kiminsə adını çəkə bilməyəcəyəm. Türkiyədən Azərbaycan kanallarını izləyirəm və inkişafı görürəm”.
Müğənni Azərbaycanın “Eurovision” mahnı müsabiqəsindəki uğurundan da danışıb və Azərbaycanı xalqını təbrik edib: “Azərbaycanın qısa müddətdə necə inkişaf etdiyini qısa müddət ərzində “Eurovision” mahnı yarışmasında qazandığı birincilik də sübut edir. Möhtəşəm ifa və qalibiyyət hər birimizi sevindirdi. Azərbaycanda bu yarışmanın möhtəşəm keçəcəyindən əminəm və artıq ciddi hazırlıqlara başlandığını bilirəm”.
2007-ci ildə Türkiyəni “Eurovision” mahnı müsabiqəsində təmsil etdiyini xatırladan sənətçi, bir daha bu yarışmaya qatılmaq istəyində olmadığını dilə gətirib: “Bir dəfə qatıldım və daha iştirak etmək istəmirəm. Amma qonaq kimi qardaş ölkəyə bu yarışmanı izləməyə dəvət olunsam, məmnuniyyətlə gələrəm. Yarışmada iştirak etməkdə məqsəd ölkəmə qarşı bir addım idi və sevgimi bu hərəkətimlə bildirdim. Əslində “Eurovision” mənim uşaqlıqdan xəyallarımda idi və bu arzuma çatdım. Sonradan isə artıq məni bütün Avropa tanıdılar və getdiyim hər yerdə imza aldılar”.
Yeni yaradıcılıq yeniliklərindən də danışan Kənan Doğulu, yanvar ayında albomunun işıq üzü görəcəyini deyib: “Yeni albomda sözləri və musiqisi yalnız özümə aid mahnılar yer alıb. Amma bu albom üçün duet fikirləşmirəm. Son duetim Sibel Canla “Hancer” adlı mahnı oldu. Sibel Can kimi yaxşı bir sənətçi ilə oxumaq da zövq verdi”.
Şəxsi həyatına da toxunan Kənan Doğulu Azərbaycan mətbuatı qarşısında etiraf da edib: “Həyatımda qərar verdim, evləndiyim zaman heç bir zaman boşanmayacağam. Hazırda həyatımda kimsə yoxdur, amma olsa, çox sevəcəyəm. Həyatımın şans mələyi xəyalımdakı insandır. Ailə qurmağı çox istəyirəm, ən əsası ata olmağı arzulayıram. Bu bəlkə də bu gün üçün həyatımda ən önəmli məsələdir”.
Qeyd edək ki, Kənan Doğulu bu gün axşam Bakıda konsert proqramı ilə çıxış edəcək. Konsert “SA Organization” şirkətinin təşkilatçılığı və Buta İncəsənət Mərkəzinin şirkətlərindən biri olan “BUTA production”un dəstəyi ilə həyata keçirilir.