Şou-biznes

Ana səhifə

Şou-biznes

İçərişəhərdə “Üzüm yığımı festivalı” keçiriləcək

26 sentyabr 2011 08:25 (UTC +04:00)

Bakı. Kəmalə Quliyeva – APA. Oktyabrın 2-də İçərişəhərdə “Caspian Coast Üzüm Yığımı Festivalı” adı altında üzüm yığımı mövsümünə və üzüm məhsullarına həsr olunmuş geniş tədbir keçiriləcək. Bu barədə APA-ya “İçərişəhər” Dövlət Tarix-Memarlıq Qoruğu İdarəsindən məlumat verilib. Qoruq idarəsinin və “Caspian Coast winery & vineyards” şirkətinin təşkilatçılığı ilə baş tutacaq festivalın hər il payız mövsümündə keçirilməsi planlaşdırılır.

Festivalın keçirilməsində məqsəd əsrlər boyu üzümçülüyü ilə şöhrət qazanmış Azərbaycanın bu ənənələrini bir daha canlandırmaq, üzümçülüyü təbliğ etmək və bu sahəyə diqqətin artırılmasına nail olmaqdır. Sağlamlıq, uzunömürlülük və firavanlıq rəmzi olan üzümün yığımına həsr olunmuş festival ərzində maraqlı müsabiqələrə tamaşa etmək, müxtəlif üzüm sortlarının və üzümdən hazırlanan məhsulların dadına baxmaq mümkün olacaq. Festivalda bir neçə komanda arasında üzüm sıxma, üzüm çəlləklərinin diyirləndirilməsi, gözləri bağlı şəkildə üzümün dadına baxmaqla onun sortunun müəyyən edilməsi və sair maraqlı müsabiqələr keçiriləcək.

Festival zamanı məşhur müğənnilərin iştirakı ilə qala konsert də olacaq. Konsertdə ötən illərdə Azərbaycanı “Eurovision” müsabiqəsində təmsil etmiş Aysel Teymurzadə, Səfurə Əlizadə və müsabiqədə 2009-cu ildə Litvanı təmsil etmiş Saşa Son, 2010-cu ildə Rumıniyanı təmsil etmiş Paula və Ovi dueti, həmçinin Moldovanı 2005 və 2010-cu illərdə təmsil etmiş “Zdub şi Zdub qrupu” iştirak edəcəklər.