Şou-biznes

Ana səhifə

Şou-biznes

Altı illik təmir-bərpa işlərindən sonra Moskvadakı “Bolşoy Teatr”ın təntənəli açılış mərasimi keçirilib - REPORTAJ -FOTO

Altı illik təmir-bərpa işlərindən sonra Moskvadakı “Bolşoy Teatr”ın təntənəli açılış mərasimi keçirilib - <font color=red>REPORTAJ -FOTO</font>

29 oktyabr 2011 09:07 (UTC +04:00)

APA-nın Moskva müxbirinin verdiyi məlumata görə, 350-dən artıq KİV mərasimi işıqlandırmaq üçün Rusiya Federasiyası prezidentinin mətbuat xidməti tərəfindən akkreditə edilib. Onların arasında “APA” İnformasiya Agentliyi də olub.

Təntənəli açılışdan 4 gün əvvəl görülən işlərlə xarici və yerli medianı tanış etmək üçün jurnalistlər üçün “Bolşoy Teatr”a ekskursiya təşkil edilib. Teatrda təmir-bərpa işləri ilə məşğul olan “Summa” şirkətinin təmsilçisi Mixail Sidirov teatrın akustikasının təmirdən əvvəl tamamilə korlandığını söyləyib. O bildirib ki, təmir ləngisəydi, mədəniyyət ocağının dağılmaq ehtimalı çox böyük olacaqdı. M. Sidirov tarix və gözəlliyi özündə birləşdirən “Bolşoy Teatr”ın bir zamanlar dünya teatrlarının reytinq cədvəlində birinci yerdə qərarlaşmasına baxmayaraq, son illər 55-ci yerdə mövqe tutduğunu xatırladıb.

Təmir-bərpa nəticəsində teatrın akusitikası xilas edilib. Belə ki, xüsusi komissiya kresloları və panelləri yoxlayıb, hər şey akustik yoxlamadan müvəffəqiyyətlə keçib. Bunu UNESCO-nun komissiyası, məşhur opera müğənnisi Plasido Dominqo, orkestrantlar, solistlər və teatrın xoru da təsdiqləyib.

Teatrın əsas səhnəsi unikaldır. Belə ki, opera və yaxud baletdən asılı olaraq döşəmə avtomatik dəyişir. Səhnədə hər şey kompüterləşdirilib. Teatrın “Bethoven” zalı isə yerin altına keçirilib. Düyməni basmaqla hərəkətə gələn platformalar teatr sahəsində yenilikdir ki, bu da ilk dəfə “Bolşoy Teatr”da tətbiq edilib. Yerin altındakı zal metro xəttinə yaxın olsa da, bu, akustikaya mane olmur.

Teatrın dairəvi zalı və imperator foyesində bütün interyer bərpa edilib. İmperator Nikolay Romanovun dövründə asılmış çilçıraq sanki 100 ilin çilçırağı deyil, şamdanlar keçən əsrlərdən qalanlardır, divarlardakı parçalar da orijinaldır. Bir sözlə, hər şey ilkin görkəminə qaytarılıb. İnteryerdəki qızıl saat hər yerdən bərq vurur. Binanın restavrasiyasında 4,5 kq qızıldan istifadə edilib. Restavratorlar binanın özülünu möhkəmləndiriblər. 2006-cı ildən 2009-cu ilə qədər - təxminən 3 il ərzində binanın təməli bərpa edilib. Daha sonra isə digər yerlərin bərpa və təmirinə başlanıb.

Təmir-bərpa işlərinə ümumilikdə 1 milyard ABŞ dolları məbləğində pul ayrıldığı fikri səslənsə də, bu məbləğin sonradan 750 milyon dollara endirildiyi bildirilib. Təntənəli açılış günü 1768 tamaşaçı yeri üçün dəvətnamələr göndərilib. Açılış üçün teatr kassalarında biletlər satılmasa da, gəzən söz-söhbətlərə görə bir dəvətnamənin qiyməti nə az, nə çox - 2 milyon rubl (67 min ABŞ dolları) olub. Lakin teatrın rəhbərliyi bu xəbərləri təkzib edib.

Təntənəli açılış mərasiminə hazırlıq yüksək səviyyədə olub. Dövlət adamları, dünya ulduzları, mədəniyyət və incəsənət xadimlərinin iştirak etdiyi açılışa Rusiya prezidenti Dmitri Medvedyev də qatılıb. Mərasimdə Azərbaycanın Rusiyadakı səfiri Polad Bülbüloğlu, azərbaycanlı iş adamı Vahid Ələkbərov, Yevgeni Primakov, İqor Krutoy, Fyodr Bondarçuk, Lara Fabian, Monika Belluci, Tamara Sinyavskaya kimi tanınmış şəxsiyyətlər iştirak ediblər.

Açılış mərasiminə həsr olunan qala-konserti yayımlamaq hüququ yalnız “Rossiya” telekanalına verilib. Digər televiziya və informasiya agentliklərinin nümayəndələri yalnız açılışı işıqlandıra biliblər. Qala-konsertdə rus klassik musiqisindən parçalar səsləndirilib. Daha sonra “Bolşoy Teatr”ın solistləri və mərasimə dəvət olunmuş məşhurlar - Dmitri Xvorostovskiy, Anjela Georgiu, Natali Dessey və Violetta Urmana çıxış ediblər.

Qeyd edək ki, açılışdan sonra teatrda səhnəyə qoyulacaq ilk tamaşanın Qlinkanın yeni versiyada “Ruslan və Lüdmila” əsərinin olacağı açıqlanıb.