Şou-biznes

Ana səhifə

Şou-biznes

Azərbaycanda “Eurovision-2012” ilə bağlı aksessuarların qanunsuz satışını həyata keçirən şəxslərə qarşı ciddi inzibati sanksiyalar tətbiq olunacaq - EKSKLÜZİV

03 noyabr 2011 08:33 (UTC +04:00)

Bakı. Ülkər Qasımova-APA. “Eurovision Song Contest – Baku 2012” ilə bağlı köynək, çanta və digər aksessuarların qanunsuz satışını həyata keçirən şəxslərə ciddi inzibati sanksiyalar tətbiq olunacaq. Bu açıqlamanı APA-ya İctimai Televiziya və Radio Yayımları Şirkətinin ictimaiyyətlə əlaqələr və monitorinq şöbəsinin rəhbəri Tahir Məmmədov verib.

T. Məmmədov bildirib ki, sözügedən məsələnin qanunsuz olduğunu dəfələrlə açıqlayıblar: “Adil Kərimli və mən dəfələrlə bu cür satışın qeyri-qanuni olduğunu vurğulamışıq. Bir daha bildirmək istəyirik ki, bu addım qanunvericiliyə ziddir və müəllif hüquqlarının ciddi şəkildə pozulmasıdır. “Eurovision” Mahnı Müsabiqəsinin loqosu Avropa Yayımları Birliyinin brendidir və onların icazəsi olmadan heç bir istehsalçı, ticarət müəssisəsi bu loqodan istifadə edə bilməz. Heç kim o loqo ilə çap olunmuş bu və ya digər məhsulları satışa çıxara bilməz”.

Tahir Məmmədov bu məsələnin Avropa Yayımları Birliyini də (EBU) ciddi narahat etdiyini vurğulayıb. Məsələdən xəbərdar olan EBU rəhbərliyi hətta bununla bağlı monitorinq keçirib: “EBU-nun həyata keçirdiyi monitorinqin nəticəsi onları qane etməyib. Eyni zamanda qeyd etmək istərdim ki, İctimai Televiziya da bununla bağlı ilkin araşdırmalar aparıb və həqiqətən də istehsalçılar tərəfindən çox ciddi şəkildə qanun pozuntularına yol verildiyi aşkarlanıb. Bu satış Avropa Yayımları Birliyinin icazəsi olmadan aparılır, bu isə çox mənfi haldır”.

Qanunsuz satışla bağlı məsələnin bununla da bitmədiyini qeyd edən T. Məmmədov, bu günlərdə İctimai Televiziyanın çəkiliş qrupu ilə birgə çox geniş monitorinq aparılacağını açıqlayıb: “Hər halda yaxşı olardı ki, bu istehsalçılar və məhsulların satışı ilə məşğul olanlar qanun qarşısında öz öhdəliklərini başa düşsünlər və bu fəaliyyətlərini dayandırsınlar. Əks-təqdirdə onlara qarşı qanuna müvafiq şəkildə ciddi inzibati sanksiyalar tətbiq olunacaq. İlkin araşdırmalarımız nəticəsində məlum olub ki, bu məhsullar arasında xaricdə hazırlanan məhsullarla yanaşı, yerli mallar da var. Qanun pozuntusuna yol verən şəxslərə tövsiyəmiz budur ki, öz qanunsuz fəaliyyətlərini dayandırsalar, daha yaxşı olar”.

Xatırladaq ki, “Eurovision-2011” Mahnı Müsabiqəsində Azərbaycanın qalibiyyətindən dərhal sonra paytaxt Bakıda üzərində “Eurovision Song Contest – Baku 2012” yazılan müxtəlif rəngli köynəklər, çantalar, eləcə də digər aksessuarlar satışa çıxarılıb. Azərbaycanda bu cür satış qanunsuz olaraq həyata keçirilir. Hər bir qalib ölkədə müsabiqə öncəsi hazırlanan bu köynəklər yalnız Avropa Yayımları Birliyinə (EBU) xəbər verildikdən sonra satışa çıxarılır. “Eurovision-2012” mahnı müsabiqəsi ərəfəsində bu cür köynəklər, papaqlar, çantalar, qələmlər, şərflər və digər bu kimi əşyalar qanuni olaraq satışa çıxarılacaq. Adətən qanuni satışa çıxarılan köynəklərin qiyməti 17-25 avro arasında olur. Amma Bakıda qanunsuz hazırlanan belə köynəklər satış yerindən asılı olaraq 5-10 manata satılır.