Şou-biznes

Ana səhifə

Şou-biznes

Hande Yenerin Bakı konserti neqativ hallarla yadda qalıb - FOTOSESSİYA

Hande Yenerin Bakı konserti neqativ hallarla yadda qalıb - <font color=red>FOTOSESSİYA</font>

14 noyabr 2011 08:42 (UTC +04:00)

Bakı. Ülkər Qasımova-APA. Türkiyənin tanınmış müğənnisi Hande Yener Azərbaycan paytaxtında konsert verib. APA-nın məlumatına görə, “Baku karting & Event Center”in təşkilatçılığı ilə keçirilən konsert bir çox xoşagəlməz nüanslarla yadda qalıb. Hande Yenerin səhnəyə saat yarım gec çıxması və təşkilatçılığın zəif olması diqqətdən yayınmayıb. Konsertdə azərbaycanlılarla yanaşı, türk gənclərinin də çoxluğu nəzərə çarpıb.

Konsert saat 20:00-da başlamalı olsa da, həmin saatlarda konsertin məşqi keçirilib. Çoxsaylı izləyicilər konsertin gec başlamasından narazılıqlarını da dilə gətiriblər və bəzi tamaşaçılar H. Yenerin səhnəyə çıxmasını belə gözləmədən zalı tərk ediblər. Saat 00:30-a kimi proqramda sponsorların təqdimatı, Azərbaycan tamaşaçısına tanış olmayan musiqiçilərin çıxışı baş tutub. Təşkilatçılar Hande Yenerin səhnəyə çıxmasını gözləyən tamaşaçılarla çox kobud davranıblar. Konsertin diqqət çəkən məqamlardan biri də mühafizəçilərin çoxluğu olub. Konsertdə bir çox tamaşaçılar 30 manat ödəyərək “Baku karting”in ən arxa hissəsində proqramı ayaqüstü izləyiblər. Gecə birin yarısında tamaşaçıların intizarına son qoyulub və Hande Yener səhnəyə maşınla gəlib. Sənətçinin olduğu avtomobil izləyicilərin arasından səhnəyə doğru irəliləyib və səhnənin yanında Hande Yener maşından enərək mühafizə xidmətinin köməyi ilə səhnəyə çıxıb. Müğənni iki mahnı ifa etdikdən sonra Bakıda çıxış etməsinin onun üçün çox önəmli olduğunu deyib: “Həqiqətən də bu şəhərdə yaşamaq çox gözəl bir hiss olmalıdır. Bu mənim ilk gəlişim deyil və bura mənə çox doğmadır. İnsanların bu qədər maraq göstərməsi məni çox məmnun edir. Bu gecə sizlər üçün ən populyar hitlərimi ifa edəcəyəm”. Sənətçi Bakıda iki hissəli konsert proqramı ilə çıxış edib. Birinci hissədə daha həvəsli olan müğənni, konsertin ikinci hissəsini həvəssiz yola verib. Sənətçini izləyənlər arasında Türkiyənin Azərbaycandakı səfiri Hulusi Kılıç da olub.