Şou-biznes

Ana səhifə

Şou-biznes

“Brainpool” şirkətinin rəhbəri: «Builki Eurovision yarışması indiyədək keçirilən müsabiqələrin ən möhtəşəmi olacaq»

25 yanvar 2012 00:04 (UTC +04:00)

Bakı. Ülkər Rəşidqızı – APA. “Eurovision müsabiqəsinin Bakıda keçirilməsi Azərbaycan üçün böyük fürsətdir ki, öz mədəniyyətini, ölkəsini Avropaya, bütün dünyaya tanıtsın. Çoxları Azərbaycanın Avropaya yaxınlığından, onun gözəl mədəniyyətinin olmasından xəbərsizdir. Deyərdim ki, builki Eurovision yarışması indiyədək keçirilən müsabiqələrin ən möhtəşəmi olacaq". APA-nın İctimai Teleradionun rəsmi internet saytına istinadən yaydığı xəbərə görə, bu sözləri Bakıda səfərdə olan may ayında Azərbaycanın ev sahibliyi edəcəyi Eurovision müsabiqəsinin səhnəsinin tərtibatı ilə məşğul olacaq “Brainpool” şirkətinin rəhbəri Jörg Grabosch deyib. Müsabiqənin Azərbaycan üçün əlverişli fürsət olduğunu deyən qonaq, hazırlıqların yüksək səviyyədə aparıldığını bildirib.
“Eurovision” layihəsinin icraedici rəhbəri Yan Ola Sand qedye dib ki, ötən illərdə müsabiqəyə qatılmayan ölkələrin builki yarışmada iştirakı yaxşı göstəricidir: "Bu həm də Azərbaycanda keçiriləcək yarışmaya marağın yüksək olduğuna işarədir. Hazırlıqlar da yüksək səviyyədə aparılır. Müsabiqə ilə bağlı gözəl ideyalar irəli sürülüb. Mən inanıram ki, müsabiqə çox möhtəşəm keçəcək". Nümayəndə heyətləri üzrə menecer Tahir Əliyevin fikrincə isə Eurovision səhnəsində Azərbaycan öz mədəniyyətini, Avropaya inteqrasiyasını yüksək səviyyədə əks etdirəcək bir şou göstərəcək. "Eurovision"-nun tədbirlər üzrə rəhbəri Sietse Bakker bildirib ki, müsabiqəyə hazırlıq böyük əmək və məsuliyyət tələb edir: "Bunun üçün təşkilatçıların üzərinə daha çox iş düşür. Lakin Bakı müsabiqəyə uğurla hazırlaşır. Təşkilati işlər də öz qaydasındadır". EBU-nun kommunikasiya koordinatoru Jarmo Siim fanat ordusunu ətraflı məlumatla təmin etmək üçün çalışdıqlarını qeyd edib: "Eurovision mahnı müsabiqəsi bizim gündəlik işimizdir. Biz əsasən müsabiqəyə hazırlıqlarla bağlı internetdə məlumatlar yerləşdiririk. Bunu daha çox sosial şəbəkələr vasitəsilə həyata keçiririk".
“Eurovision-2011” mahnı müsabiqəsinin qalib Eldar Qasımov bu müsabiqənin həyatının ayrılmaz hissəsinə çevrildiyini deyib. "Bu çox sevindirici haldır. Mən də Nigarla orada olacam. Yəqin ki, mahnı oxuyacağıq. Eurovisionla bağlı tədbirlərdə iştirak etmək çox böyük fəxrdir. Çünki bu müsabiqə artıq həyatımızın ayrılmaz hissəsidir".
Qeyd edək ki, mayın 22 və 24-də “Eurovision 2012”-nin yarımfinal, 26-da isə final mərhələsi keçiriləcək. Müsabiqənin qaydalarına əsasən 5 ölkə-Almaniya, Fransa, Böyük Britaniya, İtaliya və İspaniya, eləcə də ötən ilki müsabiqənin qalibi kimi Azərbaycan birbaşa final mərhələsində çıxış edəcək. Yarımfinal mərhələlərində iştirak edən ölkələrin "Eurovision 2012"də çıxış ardıcıllığı isə mart ayında nümayəndə heyətləri rəhbərlərinin görüşü zamanı keçiriləcək püşkatmada bəlli olacaq.