Şou-biznes

Ana səhifə

Şou-biznes

Emin Ağalarov Yaşıl Teatrda xeyriyyə konserti verib- FOTOSESSİYA

Emin Ağalarov Yaşıl Teatrda xeyriyyə konserti verib- <font color=red>FOTOSESSİYA</font>

14 iyul 2012 07:30 (UTC +04:00)

Bakı. Ülkər Rəşidqızı-APA. İyulun 13-də Yaşıl Teatrda Rusiyada yaşayan azərbaycanlı iş adamı, müğənni-bəstəkar Emin Ağalarov solo konsert proqramı ilə çıxış edib. APA-nın məlumatına görə, xeyriyyə məqsədli konsert anşlaqla baş tutub. Emin əsasən ağ rəngdən istifadə olunmuş səhnədə pərəstişkarlarının qarşısına “Eurovision-2012” mahnı müsabiqəsinin final mərhələsində ifa etdiyi “Never enough” mahnısı ilə çıxıb. Müğənni bu kompozisiyanı Bakı Simli Kamera Orkestri kaman və balabanın müşayiəti ilə ifa edib. Sənətçi konsertdə əsasən öz musiqilərini ifa edib. Repertuarına daxil olan köhnə mahnıları ilə yanaşı, o, yeni işıq üzü görən “After the Thunder” albomuna daxil olan mahnıları tamaşaçılara təqdim edib. İlk ifadan sonra zaldakı tamaşaçıları salamlayan Emin dünyanın bir çox şəhərlərində çıxış etdiyini, Bakıdakı konsertlərinin öz həyatında böyük əhəmiyyət daşıdığını vurğulayıb.

Emin Ağalarov “After the Thunder” albomunu dünyanın bir çox ölkələrində təqdim edəcəyini deyib. Konsertdə, həmçinin ölkəmizi 57-ci “Eurovision” musiqi yarışmasında təmsil edən Səbinə Babayeva “When the music dies” mahnısını tamaşaçılar üçün bir daha ifa edib. Emin zalda əyləşən “Eurovision 2011”in qalibi Eldar Qasımovu salamlayıb və bir daha ona uğurlar arzulayıb. Tamaşaçılar Bakıda keçirilmiş 57-ci “Eurovision” mahnı müsabiqəsində Emin Ağalarov ilə birgə final şousunda çıxış edən Bakı Simli Kamera Orkestrinin müşayiəti ilə yaddaqalan musiqi şousunun şahidi olublar.

Emin Ağalarov SSRİ xalq artisti, dünya şöhrətli müğənni Müslüm Maqomayevin repertuarından da mahnı səsləndirib. Hər zaman Müslüm Maqomayevi uca tutduğunu dilə gətirən müğənni, məhz ondan nümunə götürərək sənətdən zövq aldığını qeyd edib. Emin konsertində iştirak edən atası Araz Ağalarova da təşəkkürlərini bildirib: “Bir müğənni üçün ən böyük uğurlardan biri konsertində çoxsaylı tamaşaçıların iştirakıdır. Bu şansı mənə verdiyiniz üçün hər birinizə ayrı-ayrılıqda təşəkkür edirəm. Sizin hər biriniz bu xeyriyyə tədbirinə qoşuldunuz və məktəbin tikintisinə yardım göstərmiş oldunuz”. Konsertdə Eminin fan-klubu onun üçün hazırladıqları və üzərində “We love you Emin” yazılmış plakat nümayiş etdiriblər. İfasını yekunlaşdıran Emin, ikinci dəfə səhnəyə dəvət olunub və daha iki mahnı ifa edib.

Tamaşaçılara Eminin “After the Thunder” albomu da təqdim olunub. Bu albomda yer alan 11 mahnı ingilis, 2 mahnı isə rus dilindədir. Müğənninin “Eurovision-2012” mahnı müsabiqəsinin finalında oxuduğu “Never enough” mahnısı da alboma daxil edilib. Müğənni iyulun 15-də “See Breeze”də “Eurovision” ulduzları ilə birgə konsert verəcək.