Şou-biznes

Ana səhifə

Şou-biznes

Sənubər İsgəndərli: “Nicat Kazımov “Maşın” şousuna kimi mənim üçün heç bir önəm kəsb etməyib, şoudan sonra da belədir”

21 may 2007 11:51 (UTC +04:00)

“Nicat Kazımov “Maşın” şousuna kimi mənim üçün heç bir önəm kəsb etməyib, şoudan sonra da belədir. O, mənim hesabıma bu şouda qala bildi”. Bunu APA-ya açıqlamasında “Maşın” realiti-şousundan Nicat Kazımov tərəfindən uzaqlaşdırılan aktrisa Sənubər İsgəndərli bildirib. Şouya gedərkən özünə arxayın olduğunu deyən S. İsgəndərli əvvəlcədən hara getdiyini bildiyini qeyd edib. Özünə arxayın olduğunu deyən aktrisa şounun insanların iç üzünün ortaya çıxarmasını müsbət tərəf kimi qiymətləndirib: “Mənim bu tərəfdən heç bir qorxum yox idi. Tanıdıqlarım da necə idilərsə, elə də qaldılar. Amma elə insanlar var idi ki, həyatda ilk dəfə tanıdım. Nicat Kazımov ora gələn iştirakçılar arasında ən zəif iştirakçı idi. Məndən əvvəl 7 iştirakçı çıxmışdı və onların 3-ü məhz Nicatı çıxarmaq istəyirdi. Bu zəif insan oradakıların içərisində ən güclü məni gördü. İlk gün Nicatla görüşəndə özünü sığortalamaq üçün “Mən sənə heç vaxt dəymərəm” dedi ki, mən də ona belə cavab verim. Amma demədim. Orada özlərini bu cür sığortalayanlar var idi”. S. İsgəndərli N. Kazımovun öz pərəstişkarları yox, onun “pərəstişkarları” hesabına şouda qaldığını qeyd edib: “Əgər mən müraciət etməsəydim ki, Nicat bu gün məni çıxaracaq, o, səs toplamayacaqdı. Onun şəklinin atılmasında məqsəd o idi ki, onsuz da səs toplaya bilməyib gedəcək. Studiyanın bütün heyəti və iştirakçılar buna tam əmin idilər. Amma oyuna rəngarənglik qatmaq üçün müraciət etdim ki, məni çıxardacaq. Mən səsimi çıxartmasaydım, özü səs toplaya bilməyəcəkdi. Ancaq mən nəzərə almadım ki, mənim qadın “pərəstişkarım” həddindən artıq çoxdur. Bir az gec müraciət etdim və arxayınçılığın qurbanı oldum”. S. İsgəndərli maşını Xəyyam Nisanovun qazanacağını güman etdiyini bildirib.
Ötən gün “Maşın” şounu tərk edən aktyor Valeh Kərimov isə Mübariz Tağıyevin məhz onu hədəfə almasının səbəbini güclü rəqib olmasında görüb: “Bu oyun və şoudur. İlk dəfə dəvət gələndə razılaşdım və düşündüm ki, mənim yetərincə tamaşaçım var, qalib olmağıma heç bir şey mane olmayacaq. Mübariz Tağıyev üçün mən çox güclü rəqib idim və bu səbəbdən də o, məni şoudan uzaqlaşdırdı”. Aktyor şouda son üçlüyə Mübariz Tağıyev, Vado Karovin və Tünzalə Əliyevanın qalacağını deyib. /APA/