Şou-biznes

Ana səhifə

Şou-biznes

Azərbaycanı “Eurovision-2008” müsabiqəsində təmsil edəcək hər üç namizəd hazırda Ukraynadadır

19 yanvar 2008 11:56 (UTC +04:00)

APA-nın məlumatına görə, Azərbaycanın bu yarışmaya qatılması ilə bağlı Bakıya gəlmiş “Eurovision-2008” müsabiqəsinin hazırlığı ilə məşğul olan mütəxəssislər Aleksandr Ksenofontov və Pavel Qrisak bu gün keçirdikləri mətbuat konfransında bildiriliblər ki, səfərdə məqsəd namizədlərin bu yarışmaya hazırlaşmasıdır.
Hazırda hər üç finalçıya - Elnur Hüseynov, Aynur İskəndərli və “Unformal” rok qrupuna yarışmada tələb olunan səhnə mədəniyyətini öyrədilir, geyim tərzləri müəyyənləşdirilir, xarici danışıq dilini mükəmməlləşdirirlər: “Hər üç finalçı fevralın 2-də Bakıda keçiriləcək sonuncu seçim turuna ciddi hazırlaşırlar. Hazırda onlar Ukraynada seçim turunda ifa edəcəkləri mahnıları da yazdırırlar. Həmin gün bəstəkarlar İsi Məlikov, İlham Abdullayev və “Unformal” qrupunun yazdığı mahnılar ifa olunacaq. Həmin gün Azərbaycanı təmsil edəcək şəxsin adı münsiflər heyəti tərəfindən açıqlanacaq”. P. Qrisak Azərbaycanın bu müsabiqəyə qatılmasının “Eurovision” müsabiqəsini işıqlandıran Avropa ölkələrinin KİV-nin diqqət mərkəzindədir: “Bu gün Azərbaycanın bu yarışmada təmsili bu müsabiqəni işıqlandıran Avropa ölkələrinin kütləvi informasiya vasitələrinin marağındadır. Bu da Azərbaycanın bu müsabiqədə ilk dəfə təmsil olunması ilə bağlıdır. Yüksək yer qazanmaq üçün ciddi hazırlaşmaq lazımdır. Azərbaycanda da hazırda çox ciddi hazırlıq işləri gedir”. P. Qrisak “Eurovision-2008” müsabiqəsinin finalı haqqında danışmağın hələ çox tez olduğunu bildirib: “Bu gün kimin birincilik əldə edəcəyi barədə proqnoz vermək çox çətindir. Bu hər bir ölkənin və təmsilçinin özündən asılıdır. Azərbaycanını və ya Ermənistanın şansının çox olması barədə də bir söz demək mümkün deyil”. Fevralın 2-də Azərbaycanın üç finalçısı ilə birgə “Eurovision” müsabiqəsinin müxtəlif illərdə qalibi olmuş Sərtap Ərənər, Ruslana və Mariya Şerifoviçin də çıxış edəcəyini bildirən A. Ksenofontov, yerli final gecəsinin canlı olaraq Azərbaycanın İTV, Türkiyənin TRT kanalları ilə bərabər, Avropa ölkələrinin telekanllarında da nümayiş olunacağını bildirib: “Bu zamana kimi “Eurovision”un öz finalında çox gözəl şoular həyata keçirilib. Ancaq ölkələrin yerli finalında “Eurovision”un müxtəlif illərdə qalib olmuş sənətçilərin iştirakı olmayıb. Elə bu səbəbdən də Azərbaycan özünə bu qədər maraq qazana bilib. Üç qailibin bir səhnədə çıxışı Azərbaycan üçün uğur gətirəcəyinə inanırıq”. Fevralın 2-də Azərbaycan təmsilçisinin seçilməsi üçün keçiriləcək yerli final gecəsi canlı olaraq www.eurovision.tv internet ünvanında da göstəriləcək. “Eurovision-2008” müsabiqəsində Azərbaycan təmsilçisinin hansı bəstəkarın mahnısını ifa edəcəyi hələ dəqiqləşməyib. Qeyd edək ki, “Eurovision-2008” müsabiqəsində təmsil olunacaq 43 ölkədən 8-nin bu yarışmaya qatılacaq təmsilçisinin adı məlumdur. /APA/