Şou-biznes

Şou-biznes

Röya: “Mən 2006-cı il noyabrın 22-də Bakı Dövlət Universitetindən xaric edilsəm də, bir ay sonra universitetə bərpa olunmuşam”

29 fevral 2008 14:39 (UTC +04:00)

BDU-nun tədris hissəsi rəisi İbad İbadov APA-ya bildirib ki, Röya 2006-cı ilin noyabrın 22-də ali məktəbdən xaric edilib. Buna səbəb müğənninin akademik borclarının olması və sessiyalarda iştirak etməməsi olub.
Qeyd edək ki, Bu gün Yasamal rayon Məhkəməsində “Bizim yol” qəzetinin əməkdaşı Natiq Güləhmədoğlunun BDU-ya qarşı qaldırdığı iddia üzrə keçirilən məhkəmədə çıxış edən ali məktəbin hüquqi nümayəndəsi Tofiq Sadıqov Röyanın (Röyalə Yaqub qızı Nəcəfova) BDU-dan xaric edildiyini söyləyib. T. Sadıqov deyib ki, Röya 2005-2006-cı il tədris ilində qış imtahan sessiyasından qalan akademik borclarını ləğv etmədiyindən və həmin tədris ilinin yay imtahan sessiyasında iştirak etmədiyindən rektor Abel Məhərrəmovun 3/748 saylı 22.11.2006 tarixli əmri ilə BDU-dan xaric edilib.
Müğənni isə 05.12.2007-ci il tarixdə APA-ya eksklüziv müsahibəsində BDU-ya Moskva Dövlət Universitetindən köçürüldüyünü bildirmişdi: “Moskva Dövlət Universitetinə tam qanuni daxil olmuşam, I kursu orada oxumuşam. II kursdan təhsilimi Bakı Dövlət Universitetində davam etdirirəm. Odur ki, Bakı Dövlət Universitetinə qeyri-qanuni daxil olmağım barədə yazılanlar əsassızdır. Əlbəttə ki, universitetdə dərslərdə, imtahanlarda mənə güzəşt edilir. Qaldı dərslərə getməyə, axı mən qiyabi oxuyuram”. BDU-nun rektoru Abel Məhərrəmov da 20.02.2008-ci il tarixdə jurnalistlərə bildirmişdi ki, Röya iqtisadiyyat ixtisası üzrə birinci təhsilini başa vurub və hazırda hüquq ixtisası üzrə ikinci təhsilini davam etdirir: “Müğənni Röyanın Bakı Dövlət Universitetinə qəbul olunmasında heç bir qanun pozuntusuna yol verilməyib. O, BDU-nun hüquq fakültəsində ikinci ali təhsil alır və ikinci ali təhsil üçün qəbul məhz daxili testlə həyata keçirilir. Röyanın iqtisadiyyat ixtisası üzrə birinci ali təhsili barədə diplomu var və həmin diplom əsasında ikinci ali təhsil almaq üçün universitetə qəbul olunub. İkinci ixtisas üzrə təhsili alarkən universitetlərə qəbul məhz daxili testlə həyata keçirilir. Əgər sənəd verən müəyyən olunmuş yerdən çoxdursa, o zaman müsabiqə keçirilir”.