Şou-biznes

Şou-biznes

Tarkanla eyni səhnədə çıxış edəcək müğənni Zarema Azərbaycana gəlib

19 may 2008 15:40 (UTC +04:00)

Bakı. Ülkər Qasımova - APA. Mayın 21-22-də Yaşıl Teatr Bakı Konsert Kompleksində keçiriləcək konsertdə Türkiyənin meqa-starı Tarkanla eyni səhnədə çıxış edəcək kırımlı müğənni Zarema bu gün Bakıya gəlib. APA-nın məlumatına görə, Zarema Azərbaycan şou-biznesinə qatılmaq arzusunda olduğunu bildirib. Azərbaycan musiqisini çox sevdiyini deyən müğənni özünün də Azərbaycan əsilli olduğunu söyləyib: “Mənim soyadım Xəlilovadır, əslən azərbaycanlıyam. Azərbaycanda konsert verəcəyim və Tarkanla eyni səhnəni paylaşacağım üçün çox xoşbəxtəm. Tarkanla bir studiyada çalışmışam, onun necə gözəl insan, istedadlı sənətkar olduğunu görmüşəm”. Zarema şair Bəxtiyar Vahabzadənin şeirlərini dinlədiyini, azərbaycanlı müğənnilərdən Röyanı tanıdığını bildirib. Müğənni konsertdə Azərbaycan mahnıları oxuyacağını istisna etməyib, tamaşaçıları böyük sürpriz gözlədiyini deyib: “Mən “Sarı gəlin” mahnısını oxumağı çox istəsəm də, hələlik bunu bacara biləcəyimi düşünmürəm. Əgər Azərbaycanda mənə bu mahnını öyrətsələr, gələcəkdə ifa edərəm”.
O, Tarkanın iyunun 26-da Moskvada verəcəyi konsertdə də çıxış edəcəyini söyləyib.