Şou-biznes

Şou-biznes

Nazpəri Dostəliyeva: “Nadir Qafarzadənin istər sənətdə, istərsə də ifasında səhvləri olur”

20 may 2008 15:49 (UTC +04:00)

Bakı. Ülkər Qasımova - APA. Əməkdar artist Nazpəri Dostəliyeva nənə olub. Bunu APA-ya açıqlamasında sənətçinin özü deyib. O bildirib ki, bir müddət əvvəl onun oğul nəvəsi dünyaya gəlib və nəvəsinin adı Tamerlan qoyulub: “Bu ad mənim və oğlumun istəyi ilə qoyulub. Nəvəm nə atasına, nə də anasına oxşayır, mənə oxşayır. Tamerlanın ürəyimdə olan bütün arzuları həyata keçirəcəyinə inanıram”.
Bu günlərdə Vladivostokda konsert proqramı ilə çıxış etdiyini deyən N.Dostəliyeva, konsertin çox uğurlu keçdiyini bildirib: “Vladivostokda yaşayan soydaşlarımız üçün bu konsert əsl sürpriz oldu. Konsertin uğurla keçməyi heç kimə sirr deyil, sadəcə olaraq mən gəlib yalandan danışmağı sevmirəm. Sözünün ağası olan insan işini keyfiyyətli görməyi bacarmalıdır”.
N. Dostəliyeva bir müddət əvvəl “Füzuli” kantatası ilə bağlı Nadir Qafarzadə ilə söhbət etdiklərini də vurğulayıb: “Mən “Füzuli” kantatasını Nadir 10-15 yaşında olanda oxumuşam. Bu ifalar müqayisə oluna bilməz, sadəcə, savadsız insanlar ifaları müqayisə edirlər. Onunla sən pis oxumusan, mən yaxşı söhbətini etmək mənə yaraşmaz. Mən ona dedim ki, bu kantatanı oxumaqda yaxşı edib. Mən ona bu ciddi əsəri maqazin proqramlarına qatmamağı və gündəmdə qalmaq üçün istifadə etməməyi məsləhət bildim. Ciddi əsərlər toxunulmaz və müqəddəsdir. Düzdür, Nadir Qafarzadə gəncdir, istər sənətdə, istərsə də ifasında səhvləri olur”.
Türkiyədə konsert verən yerli sənətçilər sırasında birincilərdən olduğunu da diqqətə çatdıran N. Dostəliyeva hətta orada yerli sənətçilər haqqında xoşagəlməz söhbətlərə qarşı dəfələrlə çıxdığını da vurğulayıb: “Mən oradakılara qulaqburması vermişəm ki, bizim sənətçiləri Türkiyəyə dəvət etsinlər və onlara hörmətlə yanaşsınlar. Hətta onların sənətçilərimizin ünvanına xoşagəlməz ifadələr söyləməsinə qadağa qoydum. Əslində bizim sənətçilər Türkiyədə tanınmır. Bu da məni olduqca əsəbiləşdirir. Necə ola bilər ki, bizim sənətçilərdən heç kim orada tanınmır, ancaq bizim bütün kanallarımızda türk sənətçilərinin klipləri yayımlanır. Türklər isə bizim bir klipimizi yayımlamırlar. Bunun günahı bizdədir. Burada sənətçilərin səviyyəsi heç bir rol oynamır. Türkiyənin ən populyar müğənniləri bizim 99 faiz sənətçilərimizin yanından yel olub keçə bilməz. Sadəcə təqdimat, reklam lazımdır. Biz hələ də beynəlxalq səviyyəyə çıxmamışıq”.
N. Dostəliyeva Azərbaycan şou-biznesində geyimlərində heç bir çərçivə gözləməyənlərə də münasibətini açıqlayıb: “Azərbaycan musiqi aləminin, şou-biznesinin ələnmək vaxtı çoxdan çatıb. Ancaq bu məsələ mənə baxmır. Bunun üçün qanun olmalı və həyata keçirilməlidir. Artıq bütün sənətçilər bilməlidirlər ki, hər sözü efirdə danışmaq olmaz. Çılpaq efirə çıxanlar isə öz ailələrində gördüklərini nümayiş etdirirlər. Bu, ailədən gələn tərbiyədir. O əxlaqda, tərbiyədə olan insana heç kim heç nə deyə bilməz. Xalqın zövqünü musiqi ilə oxşamaq lazımdır, çılpaq bədənlə yox”. Əməkdar artist onu da deyib ki, yaxın vaxtlarda aşıq havalarından ibarət yeni albomunu təqdim edəcək.